Umiarsuit takornariartaatit qulit nutaat aappaagu tikissapput
Kalaallit takornarialerisut ulappupput. Tysklandimi umiarsuarnik takornariartaatinik sullissaqartut saqqummersitsineranni kalaallinit peqataaffigineqarpoq
Hamborgimi Seatrade Europe-mi umiarsuit takornariartaatinik sullissaqartut saqqummersitsineranni Kalaallit Nunaat arlaqartunik peqataatitaqarpoq.
- Kalaallit Nunaata tikinneqarnissaa pilerisaarisoqarlunilu aamma susoqarneranik paasissutissiisoqarpoq. Umiarsuarujussuarnik aningaasaliisoqartarnera akimasuunik sullissaqartarneq saqqummersitsinermi soqutiginartut ilagaat, Visit Greenlandimit Mads Skifte tusagassiutinut nalunaarummi oqarpoq.
Soqutigineqarluarneq
Umiarsuarnik takornariartaatinik sullissaqarneq ukioq mannamut sulineq naammassilerpoq. Ukioq kingulleq tassani ineriartorluartoqarpoq, ilaasut 20 procentingajammik amerleriarlutik. Ukioq manna aamma Nunatsinnut tikittartut amerleriaqqissimanissaat naatsirsuutaavoq.
- Hamborgimi saqqummersitsinerup takutippaa Nunarput soqutigineqarluartoq. Umiarsuit takornariartaatsit nutaat qulit aappaagu tikinnissartik pilersaarutigaat, ilisimatitsissutigineqarpoq.
Hamborgimi saqqummersitsinermi Nunatsinnit peqataapput: Albatros Arctic Cirkel, Arctic Adventure, Greenland Cruise Services, Royal Arctic Line, Blue Water Greenland, Greenland Pilot services, Kalaallit Airports, Polaroil aamma Visit Greenland.
Nuummi paarlaasarfik?
Nuummi suluusalinnut mittarfiup tallineqarnissaa aamma saqqummersitsinermi maluginiarneqarpoq.
- Nuummi mittarfiup tallineqartussaanera takornariartaatsinik suliaqartut nunanit allaneersut ilisimalluarpaat, Kalaallit Airports A/S-imit Tina Amondsen oqarpoq.
- Mittarfiup tallineqarnissaa umiarsuarnillu talittarfiginnera maluginiarneqarluarpoq. Mittarfik naammasseriarpat ilaasunik paarlaasarfittut Nuuk atorneqalernissaa eqqarsaatigineqarpoq.