Umiarsuit takornariartaatit Nuummut tikerartut

Umiarsuit takornariartaatit 35-t ukioq manna tikittussatut naatsorsuutigineqarput, taakku ilaat arlallit ilisimaneqareerput, umiarsuilli angisoorujussuit arlallit Nuummut aamma tikittussaapput

Umiarsuit tikittussat ukioq manna 35-unissaat naatsorsuutigineqarpoq, umiarsuillu taakku ilaat ilaasorpassuaqartussaapput.

Umiarsuarmik takornariartaammik illoqarfimmut tikittoqaraangat illoqarfik inoqarnerulersarpoq aamma ukioq manna umiarsuit 35-t tikittussatut naatsorsuutigineqarmata illoqarfimmi pisorpassuaqarnissaa ilimagineqarsinnaavoq. Arlallit ilisimareerpavut, umiarsuilli nutaat arlallit ukioq manna Nuummut aamma aqqusaartartussaapput. RAL-ip umiarsualivitoqaani inissaqarlualermat, umiarsuit tamarmik talittarnissaat naatsorsuutigineqarpoq. Sikuki Harbour takornarianut tikilluaqqusisarfeqarluni piareersimavoq aamma angallassisartut arlallit tikerartussarpassuarnut sammisassaqartitsissallutik aamma piareersimapput.

Ilisimalluakkatsinnit umiarsuaq avatangiisinik mianerinnittoq

Hurtigruten, maannamut ukiuni arlaqalersuni Nuummut tikittartoq, ilisimaneqarluartumik M/S Fram-imik umiarsuaqarnermi saniatigut umiarsuartaaminik aamma Nuummut tikissaaq, tassaasumik MS Roald Amundsen. Tamanna pissalluni aggustip 17-ianni. 2019 umiarsuup siullermeerluni angalaffigisussaavaa aamma umiarsuaq Issittumi silap pissusianut immikkut naleqqussagaavoq. Nunarsuarmi ilisimasassarsiorluni umiarsuarni siullersaalluni teknologi nutaaq atorlugu hybridimik innaallagissamik tamakkiisumik atuissaaq. Taamaattumik tamanna silap pissusianut aamma iluaqutaassaaq, ikummatissamimmi atuinera 20 procentinik minnerussagami. Tamanna aamma ilaasuinut 530-usunut aamma iluaqusiissaaq, umiarsuarmi nipeqanngilluinnartumik immakkut ingerlaarsinnaagami.

Umiarsuarujussuit Nuummut aqqusaassasut

Umiarsuarpassuit nalinginnaasumik 180-t 400-llu akornanni ilaasoqartartut saniatigut umiarsuarujussuit marluk tikittussanut ilaapput, taakku 3.000-it sinnilinnik ilaasoqarsinnaallutik. Siullermik MSC Orchestra 3.200-nik ilaasoqarsinnaasoq aggustip 19-ianni tikissaaq. Ullut arlaqanngitsut qaangiutiinnartut aggustip 24-anni aamma aggustip 26-anni umiarsuaq Caribbean Princess 3.140-nik ilaasoqarsinnaasoq Nuummut aqqusaartussatut naatsorsuutigineqarpoq. Taamaattumik Tupilak Travel umiarsuarnut taakkununnga ilaasunut arlalinnik angallassinernik aaqqissuussisartoq, ulluni taakkunani takornarianik nassuiaasussanik pissarsiorpoq.

Nuuk soqutigineqarluartoq

Umiarsuit takornariartaatit talikkaangata aamma inuppassuit ataatsikkut Nuuk takusassarsiorfigileraangassuk ingasaginarsinnaasarput. Pingaaruteqarporli eqqaamassallugu, inuit Nuummut Nunatsinnullu tikittartut maanngarniarlutik aalajangiussisimasarmata. Akikinnera kianneraluunniit tamatumunnga patsisaanngilaq. Soqutigisaalli tassaasarlutik kulturi maaniittoq aamma pinngortitaq alutornartorsuaq avatangiiserisarput. Taamaattumik tikeraartutta ilassineqarluartarnissaat eqqaamagisiuk. Naapikkaangakkit qungujuttarlugit, nukissaqarfigigukkulu inussiarnersumik ilassisarniakkit. Illoqarfitsinnut tamanna nalitoorujussuusarpoq, maanimiullu arlalissuit maanga tikeraarnerat aningaasarsiutigilluartarpaat.

Tikittartorpassuit pissarsiaqarfigikkit

Nuummut tikeraartartorpassuit aningaasarsiorfiginissaat ajornanngilaq. Tassami arlalinnik periaaseqarlutit aningaasarsiorfigisinnaavatit. Tikeraartutsinnik nassuiaassisuunissaq periarfissaavoq. Angalatitsisartut assigiinngitsut attaveqarfigikkit aperalugillu umiarsuarmik tikittoqaraangat immikkut ikiuussinnaasumik pisariaqartitsinersut. Periaaseq alla tassaavoq umiarsuit tikikkaangata talittarfiup eqqaani tuniniaaffeqarneq. Tikeraartut qitiusumik ornittagaanni nutaami umiarsualivimmiittumi tuniniaaffissarsisinnaavutit. Eqqaamaannassavat tuniniakkatit tikeraanut soqutiginartuussammata. Skuut atorunnaakkat CD-t qanganitsat assigisaalu piukkunnaateqanngillat.

Maannamut arlaleriarluni takuneqartareersutut tikittartorpassuit atuaqatigiinnit paasisassarsiorlutik angalanissaminnut katersisunit, takornariat kalaallisoorluni qaqortumaarluniluunniit assiliseqatigineqartarput aamma kaaginik assigisaanilluunniit tuniniaaffigineqartarlutik.

Isumassarsiorit isumassarsiatillu piviusunngortillugit.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS