Umiarsuit takornariartaatit Nuummiittut

Nuuk umiarsuarnik takornariartaatinik pingasunik marlunngornermi juulip tallimaanni tikeraartoqarpoq.

Krydstogt, turisme

Umiarsuaq takornariartaat angisooq Ambience, Ambassador Cruise Linemit pigineqartoq, Bahamasimi Nassauimi angerlarsimaffeqartutut nalunaarsorsimasoq, 1000-it missaannik ilaasoqarluni marlunngormat aqqusaarpoq. Taanna 1400-nik ilaasoqarsinnaavoq, aviisi Sermitsiaq allappoq.

Nuummukannginnermini Qaqortoq, Narsarsuaq, Sisimiut aamma Ilulissat aqqusaaqqaarpai. Umiarsuaq Tuluit Nunaannit Nunatsinnukannginnermini Islandimut aqqusaarsivoq, Nuummeereerunilu Tuluit Nunaannut uteqqissasoq, Jens Christian Hildestad Arctic Adventuremeersoq ilisimatitsivoq. Arctic Adventure umiarsuup Nunatsinniinnerani Tupilak Travel suleqatigalugu attaveqaataavoq.

- Nuummi angalaarnissamut illoqarfimmi periarfissat tamaasa, illoqarfimmiunit neqeroorutigineqartut neqeroorutigaavut. Ilaatigut tamakku tassaallutik illoqarfimmi angalaarussinerit, immiorfimmut pulaar­neq, pisummik angalaartitsinerit, angerlarsimaffimmut pulaarnerit aamma umiatsiamik angalaarnerit. Illoqarfinni allani aam­ma taamaaliortarpugut. Neqeroorutigineqartut siamasissuutinniartarpavut, kikkut tamarmik neqeroorfigineqarsinnaaniassammata, aamma illoqarfimmiut suliffeqarfiutaat amerlanerpaat tikeraartoqarnerminnit sapinngisamik annerpaamik pissarsisinnaaniassammata, Jens Christian Hildestad oqarpoq.

Visit Greenlandimit oqaatigineqartut naapertorlugit umiarsuaq septembarimi tikeqqissaaq ilaatigullu Narsarsuaq/Qassiarsuk aamma Qaqortoq tikeraassallugit.

Hurtigrutenimik ilisimasassarsiornerit

Hurtigruten Expeditionip umiarsuaa nutaaq ikummatissamik innaallagissamillu ingerlateqartoq Fridtjof Nansen siullermeerluni Nunatsinniippoq.

Taanna 2020-mi sananeqarpoq, ilaasunullu 530-nut inissaqarluni, Visit Greenlandip umiarsuit takornariartaatit tikittussat allattorsimaffiutaani taama allassimavoq. Hurtigruten Expeditionsip nittartagaani oqaatigineqartutut angallassinerit Reykjavikimit Ilulissanut pisassapput, aqqutaanilu aqqusaarsiffigissallugit Qaqortoq, Ivittuut, Nuuk, Kangerlussuatsiaq, Sisimiut, Ilulissat aamma Sullorsuarmukariarluni utimut saassaaq Maniitsumukassalluni ingerlaqqillunilu Kuannersuumukassalluni Qaqortumukariarlunilu Reykjavikimut utissalluni.

Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS