Umiarsuit takornariartaatit Nuuk tunullugu Reykjavík piumanerugaat
Kalaallit Nunaanni mittarfiit annersaat Kangerlussuaq suli matuneqariaannaavoq. Taamaattumik umiarsuit takornariartaatit ullumikkut Kangerlussuarmi ilaasuminnik paarlaassisartut siunissami Nuummiit Reykjavik atortalerniarpaat
Ungasinngitsukkuut nalunaarutigineqarpoq Kalaallit Airportsip Danmarkimi entreprenørit ingerlatseqatigiiffiat Munck Gruppen Nuummi Ilulissanilu mittarfiliortussatut toqqarsimagaa.
Issittumi ilaatigullu Kalaallit Nunaanni umiarsuarmik takornariarneq ukiuni makkunani annertusiartorpoq.
2023-imili mittarfissuit marluk mikinerungaatsiartulli naammassippata Kalaallit Nunaanni mittarfissuit annersaata Kangerlussuup ataannarnissaa matuneqarnissaaluunniit pillugu Naalakkersuisut Inatsisartullu suli nalorniuarsinnaarput, Sermitsiaq allappoq.
Attatiinnarneqarnissaanik neriuut
- Umiarsuarmik takornariartitsisartut suleqatigisatta amerlanersaasa neriuutigaat Kangerlussuup mittarfia ullumikkutut ingerlaannassasoq. Taamaanngippat timmisartuutileqatigiit suleqatigalugit ilaasuminnik paarlaassisarneq Kangerlussuarmiit Reykjavik atorusunneruaat Nuup mittarfissaata atorneraniit. Umiarsuarnik takornariartitsisartut 15-it missaanniittut Kalaallit Nunaat pillugu suleqatigisatta affaaniit amerlanerusunit taamatut oqariartorfigineqarpunga, Kangerlussuarmi Albatros Arctic Circlemi pisortaq Jørgen Larsen oqarpoq.
Kangerlussuarmi Mittarfeqarfiit mittarfiat taamaalillunilu Kalaallit Nunaanni inuinnarnut mittarfiit annersaat Kalaallit Nunaanni umiarsuarmik takornariarnermi pingaaruteqarnerujartorpoq. Kangerlussuarmi 2.800 meterinik mittarfeqartumi aasat tamaasa umiarsuit takornariartaatit amerlanerujartortut tulattalerput ilaasutik timmisartunik attartukkanik ilaallutik tikittut aallalersulluunniit taarserniarlugit.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: