Umiarsuit takornariartaatit nunatsinni 700-riarlutik tulannissamik pilersaaruteqarput

Umiarsuit takornariartaatit nunatsinnut ukioq manna katillugit 689-eriarlutik tulannissamut pilersaaruteqarput. Nalunaartullu ullut tamaasa amerliartorput. Siorna piffissap taamaasinerani nalunaarutigineqarsimasut 462-iupput, tassa ukioq manna naatsorsuutigineqartunit 200-t sinnerlugit ikinnerullutik.

- Aatsaat taama amerlatigaat. Tulannissamut pilersaaruteqartut siornatigut taama amerlatiginikuunngillat. Nunatta tikitassatut soqutigineqarnera soorunami nuannaarutigaarput.

- Ineriartornerup piujuarnermik tunngaveqarnissaa soorunami soqutigisarilluinnarparput, tikitat sullissisoqarnikkut naammattuarnissaat pisariaqarmat. Sinersorluni takornarialerinermi pissarsiat annertunerpaasarnissaat taamaasilluta qulakkeersinnaagatsigu, Visit Greenlandimi pisortaq, Anne Nivíka Grødem Sermitsiaq.AG-mut oqarpoq.

Nunarput piareersimava?

Nunatsinni Naatsorsueqqissaartarfiup kisitsisaataani nutaani takuneqarsinnaavoq nunatsinnut umiarsuarmik takornariartaammik ilaallutik tikissimasut 2022-mi 44.000-iusut. Avannamut Siorapalummiit tunumut Ittoqqortoormiinut sinerlugu tikittoqarnissaa ukioq manna naatsorsuutigineqarpoq. Umiarsuit ilaat 2.000-it sinnerlugit ilaasoqartarput, ataasiakkaallu 3.000 sinnerlugit ilaasoqartarlutik.

Soqutiginnittoqarluarnera Visit Greenlandimit nuannaarutigineqaraluartoq, taamaattoq tikitassani sullissisinnaasut takornarianut taama amerlatigisunik tigusisinnaanersut eqqumaffigineqartariaqarsoraa.

- Qaqortumi sullissisinnaasut Ilimanamilu sullissisinnaasut amerlassusaat assigiinngitsorujussuupput. Tikeraat tikinneqartunilu sullissisinnaasut oqimaaqatigiissarnissaat pisariaqarpoq. Tikeraanut tikinneqartunullu misigisaq nuannersuutikkumallugu, Anne Nivika Grødem oqarpoq.

Unammillernarsinnaasutut taavaa umiarsuarmi takornariartaammi ilaasup siorna iluaallernera, inuunerminillu navialinera. Nunaqavissut oqartussanut sianeqattaarneri ilungersunarsimasut eqqaavaa. Takornariat ukioq manna amerlanerussammata, piareersarluarsimanissaq pisariaqarpoq.

- Umiarsuit takornariartaatit amerlanerusussaammata, nunatsinni attaveqaateqarnikkut unammillerneqarnissaq suli annertuneruvoq. Tamanna inuiaqatigiittut eqqumaffigisariaqarparput. Pingaaruteqarpoq takornarialerisuinnaat kisimiillutik piareersimannginnissaat, inuiaqatigiinnili tamat piareersimanissaat. Anartarfeqarniarneq, nioqqutissat, pisuttuarfissat sullissisullu allat tamarmik pineqarput, Anne Nivika Grødem oqaluttuarpoq.

Isertitat qanoq amerlatigineri nalunartut

Visit Greenlandip umiarsuarmik takornariartaatinik sullissineq pillugu siorna ukiakkut misissuititsilerpoq. Misissuinermit inernerit tunngavigalugit Visit Greenland inuussutissarsiornermut innersuussuteqarpoq. Innersuussutit politikerinut, takornarialerisunut allanullu susassaqartunut maj qaammat naatinnagu saqqummiunneqassapput.

Anne Nivíka Grødem ilisimatitsivoq, Visit Greenlandip nunarput umiarsuarmik takornariartaatinut annerusumik nittarsaatinngikkaa. Takornariartaatilli soqutiginninnerata pilersaarusiorluakkamik piujuaannartitsinermillu tunngaveqartumik tikikkuminartuunermik periusissiortoqarnissaa pisariaqartilerpaa. Sullissinerup iluani akitsuusersuinissamik qulakkeerinninnissaq pingaartumik sammisariaqarpoq:

- Ineriartornerup piujuaannartitsinermik tunngaveqarnissaa pingaaruteqarpoq. Akitsuusersuineq tassani eqqarsaatigineqartariaqarpoq, takornariartitsisarneq nunatsinnut iluaqutaaneroqqullugu.

- Innersuussutit pisortanut uagutsinnullu tunngasut sinaakkusiinermik suliaqarnermi pitsaanerpaatikkusullugit, inuussutissarsiornermik suliaqartut tusarnissaat pingaartipparput, Anne Nivika Grødem oqarpoq.

Ilanngullugu tikkuarpaa takornariartaatit nunaqavissunik suleqateqarnerusinnaasut. Takornarialerisunit innersuussutit Visit Greenlandip katersorsimavai, oqartussat tunngaveqartumik aalajangiisinnaalernissaat siunertaralugu.