Umiarsuit nakkutilliisut: Danskit marloqiusamik periuseqarnerat
EU-mi suliariumannittussarsiuussinissat pillugit Danmark piumasaminik ingerlatsivoq Danmarkimisuliffeqarfinni sapinngisamik amerlanerpaanik suliffissaqalersitsiniassammata, Pele Brobergoqarpoq.
Forsvarsministeria Danmarkimi sakkutuunut imarsiortunut umiarsuarnik nakkutilliissutinik
arfinilinnik nutaanik Danske Patruljeskibe K/S-imut pisiniarluni inniminniivoq – ingerlatseqatigiiffik Danmarkimi teknologiskiusorujussuarnik sakkussiortumit Termamit, umiarsuarnik ilusilersuinermut suliffeqarfimmit Odensemeersumit OMT Navalimit aamma soraarnerussutisianut ingerlatseqatigiiffimmit PensionDanmarkimit suliassamut tassunga atatillugu pilersinneqartoq.
Tamanna EU-mi suliariumannittussarsiornani pivoq – naalagaaffiup isumannaatsuunissaagooq pillugu. Illersornissaqarfimmi tusarfiit ilaannit naatsorsuutigineqarpoq pisiniarluni inniminniineq minnerpaamik 5 milliarder koruuninik naleqassasoq. Aviisi Sermitsiaq allappoq.
Tamatuma peqatigisaanik danskit kalaallillu politikerii Issittumi piginnaasaqalernissamut maajip aallartinnerani isumaqatigiissuteqarput, tassani piumasaqaataalluni Kalaallit Nunaanni suliassat katillugit 900 millioner koruunit sinnerlugit aningaasartaqartut EU-mi
suliariumannittussarsiorneqassasut – Kalaallit Nunaat EU-mut ilaasortaanngikkaluartoq.
Kalaallit Nunaanni EU-mi suliariumannittussarsiornissamik piumasaqarnerup ilutigisaanik EU-mi suliariumannittussarsiornertaqanngitsumik umiarsuarnik nakkutilliissutinik nutaanik inniminniineq Inatsisartuni ilaasortamit nunanullu allanut naalakkersuisuusimasumit Pele Brobergimit (N) aalassassutigineqarpoq, isumaqarami EU-mi suliariumannittussarsiornerit Kalaallit Nunaanni suliffeqarfiit suliniutinut peqataanissaannut sanngiinnerulersitsisut.
Quianaannartoq
- Marloqiusamik periuseqarneruvoq quianaannarlunilu, Pele Broberg Sermitsiamut oqarpoq.
- Oqarusussinnaavunga »Qanormi oqarpunga?«, takutinneqaannarpormi Danmark
malittarisassanik iluarisaminik allanngortitsisartoq. Umiarsuit nakkutilliissutit pillugit suliap uppernarsarpaa Danmarkimi illersornissamut politikki illersornissamut tunngassuteqarani Danmarkimi suliffissaqartitsinermik Danmarkimilu suliffissuaqarnermik ikorfartuinermut tunngassuteqartoq.
Oqaluttuaq tamaat aviisimi Sermitsiami sapaatip-akunnerani matumani saqqummersumi atuaruk. Ugguuna iserfigisinnaavat: