Umiarsuarnik takornariartitsisartut: Aappaagumut malittarisassaliortoqartariaqarpoq

Ukioq manna umiarsuarnik takornariartitsineq ajalusoorluinnareersoq, Visit Greenlanip sapaatip akunnerani kingullermi Sermitsiaq.AG-mut oqaatigaa.

Issittumi umiarsuarnik takornariartitsisartut peqatigiiffiat (AECO) taamatut aamma inerniliivoq.

Oqartussallu umiarsuarnik takornariartitsisarnerup qanoq aallarteqqinneqarsinnaanera pillugu malittarisassanik suliaqarlutik aallartiaanngippata, 2021-mi takornariartitsinissaq aamma ulorianartorsiulersinnaavoq.

- Takornariartitsisartut aappaagumut pilersaarusiorlutik aallartingajalerput, malittarisassallu kingusinaarluni saqqummiunneqassappata, Kalaallit Nunannut umiarsuarnik takornariarusuttunik kajumissuseqalersitsinissaq ajornannerussaaq, AECO-mi pisortap tullia Anders la Cour Vahl naliliivoq.

Oqaloqateqarnissamik pisariaqartitsilluinnarneq

Taassuma oqaatigaa, takornariartitsisartut malittarisassat qanoq ittut malissanerlutikkit paasiaatuugunnikkit, qanoq iliuuseqarsinnaanerlutik iliuuseqarsinnaasut:

- Umiarsuarmi iliuusaasinnaapput imaluunniit sulisunik sungiusaanerusinnaavoq. Oqartussat inuussutissarsiortullu taamatut inissisimanermi oqaloqatigiinnissaat pisariaqartinneqarluinnarpoq, Anders la Cour Vahl oqarpoq.

Taassuma oqaatigaa, Norgemi killilersuutitalimmik umiarsuarnik takornariartitsisinnaanermik akuersisoqarsimanera Kalaallit Nunaata iluaqutisisinnaagaa:

- Angalaqqilaartoqalersimanera pitsaasuuvoq. Tamatumanimi misilittagaqartoqalissaaq, taavalu suna ajunnginnersoq sunalu sukateriffigineqassanersoq il. il. paasineqassalluni. Taamaammat oqartussanut inassutigerusuppara, Svalbardimi malittarisassaliarineqarsimasunik misissueqqullugit, Anders la Cour Vahl oqarpoq.

Ilaasinnaasut affaannaannik ilaasoqarsinnaasoq

AECO Norgemi oqartussat suleqatigalugit, Svalbardimi umiarsuarnik takornariartitsinissamut malittarisassalioqataasimavoq.

Umiarsuit tassani amerlanerpaamik 500-nik ilaasoqarsinnaatitaasimapput, tassa ilaasinnaasut affaannaannik ilaasoqarsinnaatitaallutik. Ilaasut aamma COVID 19-imut misissortissimasussaapput.

- Tamatsinnut iluaqutaasussamik Kalaallit Nunaanni umiarsuarnik takornariartitsisarnerup illersorneqarsinnaasumik aallarteqqinneqarnissaa qulakkeerniarlugu, aalajangiisartut inuussutissarsiuteqartut oqaloqatigalugit aaqqiissutissarsiorusussuseqarnissaat neriuutigaarput, Anders la Cour Vahl oqarpoq.

Naalakkersuisoq erseqqissaateqarsinnaanngitsoq

Umiarsuarnik takornariartitsisartut ernumaasuteqarnerannut Inuussutissarsiornermut Naalakkersuisoq Jens-Frederik Nielsen Sermitsiaq.AG-mit oqaaseqartinniarneqaraluarpoq, maannakkorpiarli umiarsuarnik takornariartitsisartunut erseqqissaateqarsinnaannginnerarpoq.

Peqqissutsimulli Naalakkersuisup Anna Wangenheimip KNR-mut ilisimatitsissutigisimavaa, umiarsuarnik takornariartitsisarnerup ernummatigineqarnera paasisinnaallugu, Naalakkesuisulli siullertut anguniagarigaat innuttaasut tunillatsinnginnissaasa illersorneqarnissaa. Tamannarpiarlu maanna malittarisassanut tunngaviusoq.