Umiarsuaq utiinnartariaqartoq: Inuttaq aalakoortutut pasineqartoq
Angaju Ittuk Narsamit aallarsimatsiaannarluni utertariaqarsimanera pillugu politiit maanna misissuleruttorpaat. Tassami inuttat ilaata imigassartorsimasutut pasineqarnera pissutigalugu umiarsuaq utiinnartariaqarsimavoq.
Royal Arctic Line ullaaq ilisimatinneqarpoq Angaju Ittuk Narsamit aallarsimatsiaannarluni utertariaqarsimasoq.
Inuttat ilaata migassartorsimasutut pasineqarnera pissutigalugu utiinnartariaqarsimasoq umiarsuaatileqatigiiffik ilisimatitsivoq.
Nunatta Politiivisa pisimasoq uppernarsarpaat, pisorli misissorneqaleruttormat suli oqaaseqarfigineqarsinnaanngilaq.
Imigassamut inatsisit
Royal Arctic Line Narsamit sapinngisamik piaarnerpaamik taartissarsinissaa sulissutigineqarpoq, umiarsuup Kujataani nunaqarfinnik pilersuinini aallarteqqissinnaaniassammagu.
- Royal Arctic Line imigassaq pillugu erseqqilluinnartumik politikkeqarpoq inuttat, umiarsuaq usillu imaani isumannaallisarnissaat illersorumallugu. Najoqqutassanik pineqartunik unioqqutitsineq akuerineqarsinnaanngilaq. Inuttat sinneri politiillu pisumut atatillugu iliuuseqarnerannut qutsavigaagut, RAL allappoq.