Skip to main content

Umiarsuaq tunillatsissimasumik issimasulik tyskimit milliardæriusumit pigineqarpoq

Umiarsuaq ilisimatusartunit angallatigineqartoq coronamik tunillatsisimasumik issimasulik, Tuluit Nunaannit Island aqqusaarlugu Kujataanukarsimavoq, Nunatsinni Nakorsaaneq ilisimatitsivoq. Umiarsuaq tyskimit milliardærimit pigineqarpoq, nunanilu tamalaani nersornaaserneqartarsimalluni.

IA-mi politikkerip Sofia Geislerip oqartussat nanortalimmi sapaatip akunnerani kingullermi coronamik tunillatsittoqarsimanera pillugu suliaannik pingasunngormat isornartorsiorpai.

Politikkeri isumaqarpoq, oqartussat suliamut tunngatillugu paasissutissiissutaat naammanngitsut.

Taanna ilaatigut isumaqarpoq, angallatip coronamik tunillatsissimasumik issimasullip suminngaanneersuunera innuttaasut ilisimasariaqaraat.

Nunatsinni nakorsaanerup siusinnerusukkut KNR-mut ilisimatitsissutigisimavaa, ilisimatusartut umiarsuaata suminngaanneersuunera oqaluttuarerusunnagu, umiarsuarli nunamit Naalagaaffeqatigiit avataanneersuusoq oqaatigalugu.

Innuttaasut ilisimatinneqarsinnaasut

Nunatsinnili nakorsaanerup allakkatigut Sermitsiaq.AG-mut akissuteqarnermini ilimatitsissutigaa, innuttaasut maanna paasissutissinneqarsinnaanerat akornutissartaqanngitsoq:

- Umiarsuaq "Hetairos" Cayman Islandsimi nalunaarsugaavoq. Umiarsuaq Tuluit Nunaannit Island aqqusaarlugu Nanortalimmukarsimavoq, Nuntatsinni Nakorsaaneq Henrik L. Hansen allappoq.

Sofia Geislerip ilanngullugu paaserusussimavaa, coronamik tunillatsissimasoq napparsimarujussualissagaluarpat imaluunniit umiarsuami napparsimasoqalissagaluarpat kina akisussaasuussanersoq.

Ikiuinissamut pisussaaffeqarneq

Nunatsinni nakorsaanerup tassunga atatillugu ilisimatitsissutigaa, umiarsuup Kalaallit Nunaanniinnerani taamatut pisoqassagaluarpat, Kalaallit Nunaat ikiuunnissamut qinnuigineqarsinnaasoq:

- Umiarsuaq maanna imaani avataaniippoq. Umiarsuarmi napparsimasoqalissagaluarpat, umiuarsuarmi naalakkap akisussaaffigaa issimasut katsorsarneqarnissaat. Nunamillu ikiorserneqarnissamik pisariaqartitsisoqassappat, nuna qaninnerpaaq umiarsuarmi inuttat ilaasulluunniit napparsimasut katsorsarneqarnissaannut ikiuunnissamut pisussaaffeqarpoq, nunatsinni nakorsaaneq nassuiaavoq, nangillunilu oqaatigalugu:

- Kalaallit Nunaat taamatut pisoqarnerani ikiuunnissaut qinnuigineqarsinnaavoq, periarfissallu atorlugit ikiuunnissamut pisussaaffeqarluni. Periuseq tamanna atuuttuaannartuuvoq, ilaatigullu kilisaatini, umiarsuarni assartuutini, umiarsuarni ilaasartaatini/takornariartitsisartuni kiisalu nammineq angallatigisami inuttat ilaasulluunniit napparsimasut ajoqusersimasulluunniit katsorsartariaqaraangata atorneqartarluni, Henrik L. Hansen allappoq.

Tikittoqarnerani malittarisassanik misissuisoqartoq

Tunillatsittoqarsimasoq pillugu suliaq immikkut ittumik tupaallaataasimavoq, paasinarsisimammami ilisimatusartut umiarsuaanni coronamik tunillatsissimasoq inuttat allat peqatigalugit mattussimasussaanermut malittarisassanik malinninnatik Nanortaliup illoqarfiani angalaarsimasut.

Nunatsinni nakorsaanerup tassunga atatillugu ilisimatitsissutigaa, umiarsuit nunanit allaneersut Kalaallit Nunaanni umiarsualivinnut tulatsillugit malittarisassat oqartussanit misissorneqaleruttortut.

Oqartussat taamaaliornermikkut neriuutigaat taamatut assigusumik pisoqaqqissanngitsoq, tassa inuttap ataatsip Kalaallit Nunaanni coronamut atatillugu malittarisassanik paasinnissimannginnera eqqarsaatigalugu.

Angallassuaq nuannaariartaat nersornaaserneqartarsimavoq

Ilisimatusartut umiarsuaat imaluunnit eqqornerusumik oqaatigalugu angallassuaq nuannaariartaat ”Hetairos” 62 meterinik takissuseqarpoq 2011-milu Finlandimi sananeqarsimalluni, aamma kusanartumik ilusilersugaanini akimarpaluttunillu pequsersugaanini  pissutigalugit nunani tamalaani nersornaasigaasarsimavoq.

Angallat nuannaariartaat tyskemit milliardæriusumit Otto Happelimit pigineqarpoq, piginnittup suliffeqarfik GEA nunarsuarmi atortorissaarutinik pilersuisunngortillugu allanngortissimavaa, ilaatigullu maskiinanik aamma inuussutissanik suliarinninnissamut atortunik saqqummiussisarsimalluni. Suliffeqarfik 1989-imi børsimut nalunaarsortissimavaa, ullumikkullu Forbesip nunarsuarmi milliardæritut pisuujunerpaat allattorsimaffiutaani allassimalersimalluni.

"Hetairos"-ip Australiami Hobartimut tikinnra videomi takuuk.

 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER