Umiarsuaq saarullinnik uumasunik tunitsivik qaammammik sioqqutsilluni angalalersoq
Nunatsinni kitaata upernaakkut kissajaarnera pissutigalugu Royal Greenlandip umiarsuaa saarullinnik uumasunik tunitsivik, Tuneq, qaammammik ataatsimik siusinaarluni angalalerpoq.
Royal Greenlandip kilisaataa tunitsivik nutaaq, Tuneq, saarullinnik uumasunik sisamanngornermi 27. april qalusiffigalugu tunitsivitut aallartippoq. Saarulliit uumatillugit aalisartunit pisat, qaluneqartut Maniitsumi qassutinut inissinneqassapput kingornalu tunisassiarineqarlutik.
Sermitsiaq.AG-p kilisaat tunitsivik qaluseqqaammernerani pulaarpaa. Qalusineq siulleq qassusersorlutik aalisartut saarullinnik uumasunik 40 tonsingajannik tunisisimapput.
- Umiarsuaq angineruvoq, taamaattumillu Maniitsumut qalusatta inissikkiartunnginnerini katillugit 180 tonsinik tunisisoqarsinnaavoq. Umiarsuup tigusisinnaanerunera isumaqarpoq tunisassiorfiit unissanatik saarullinniarneq tamakkerlugu tunisassiorsinnaalersut, kilisaammi tunitsiviusumi Tunermi skipperi, Jonhard Haraldsen Sermitsiaq.AG-mut oqaluttuarpoq.
Saarulliit uumatillugit Royal Greenlandimut tunineqarsimatillugit, saarulliup nerpia pitsaanerusartoq, saarulliit pillugit ingerlatsinermut aqutsisoq, Sten Sørensen suliffeqarfiup nittartagaani nassuiaavoq.
Saarullinnik amerlanerusunik tunisinissaq nalunaarutigineqareersoq
Maniitsumi saarullinnik uumatitsivik siornatigut isornartorsiorneqartarsimavoq. Aalisartut ilaasa oqaluttuaraat saarulliit suli tunineqartigatik toquinnartartut, kilisaat tunitsiviusussap utaqqineqarani.
Royal Greenlandilli ukioq manna maluginiarpaa saarullinnik uumatitanik tunisinissamut aalisartut soqutiginnilluartut. Umiarsuaq tunitsiviusussaq, siorna atorneqartumit "Maniitsoq"-mit angineruvoq, marloriaammillu tigusisinnaanerulluni.
Kitaani aalisartut saarullinnik uumatitanik katillugit 500 tonsinik tunisinissartik naatsorsuutigilereerpaat. Saarulliit pillugit ingerlatsinermut aqutsisoq oqaluttuarpoq aprilip qaammataata naanerani tunisassanik nalunaaruteqartut aatsaat taama amerlatigisut:
- Saarullinnik Nutaaq-tut tunisassiassanik aalisartuniit ukiuni tulleriinni tapersersorneqarnerput annertusiartuinnarpoq, ukiorlu manna aamma taamaappoq. Saarulliit 500 tonsit aaneqartussatut nalunaarutigineqarsimasut tamanna takutippaat, ulapaarfissarlu qilanaaraarput, Sten Sørensen oqarpoq.
Utaqqisarneq sivikillissaaq
Tunermi skipperi ilisimatitsivoq kilisaat tunitsiviusoq Nuup kangerluani aalisartut pisaannik aallertaqattaassasoq. Aalisartut saarullinnik uumatitanik pisaqareernerminni ullut qulit 14-illu akornanni utaqqisarput, Tunermut tunisinnginnerminni. Tunisinermi saarulliit uumatitat kilisaammut milluaatitigut qaluneqartarput, kar-ersuarnullu uumatitsiviugallartussanut nuunneqartarlutik.
- Umiarsuaq nutaaq atorlugu piffissaq orsussarlu sipaarnerulerpagut. Aalisartut sivikinnerusumik utaqqisarnissartik aamma naatsorsuutigisinnaavaat. Novemberip tungaanut saarullinnik uumatitanik aallertarnissarput naatsorsuutigaarput, Jonhard Haraldsen oqarpoq.