Umiarsuaq ilisimatuussutsikkut misissuutissaq nutaavissuaq Nuummut tikilersoq
Tarajoq Tarajoq inuttanik aqqaneq marlunnik inissaqartitsivoq, ilisimatusartunillu 20-nik ilaasoqarsinnaalluni.
Pinngortitaleriffiup ilisimatuussutsikkut misissuutissaa nutaavissuaq marlunngornermi ualikkut pingasunut Nuummut tikissaaq.
Pinngortitaleriffik tusagassiorfitsigut nalunaaruteqarluni taamatut ilisimatitsissuteqarpoq.
Umiarsuaq Tarajoq sananeqarami 235 millioner koruuninik akeqarsimavoq, Aage V jensens Fondemiillu tapiiffigineqarttumik Namminersorlutik Oqartussanit aningaasaliiffigineqarsimalluni. Umiarsuat imaatigut nakkutilliinermut avataasiorlunilu ilisimatusarnermut atorneqassaaq:
- Umiarsuaq misissuutissaq nunatsinni nunarsuarmilu tamarmi Issittumi ilisimatusartarnerit eqqarsaatigalugit sannamigut nutaanik periarfissiissuteqartussaavoq. Raajat aalisagaqatigiiaallu allat aammalu silap pissusiata imaani avatangiisinut uumassuseqarnermullu sunniutaannik misissuisarnerit siunissami nukittorsaavigineqassapput, Pinngortitaleriffik allappoq.
Tarajoq ilisimatuussutsikkut misissuummut Pâmiunut 2018-imi atorunnaarneqartumut taartaavoq. Ukioq taanna umiarsuassaq nutaaq sanallugu aallartinneqarpoq.
Norgemi Skipsteknisk AS umiarsuarmik titartaasuusimavoq, Spaniamiulu amutsivik BALENCIAGA sanaartortuusimalluni, Tarajoq Namminersorlutik Oqartussat sinnerlugit Pinngortitaleriffimmit ingerlanneqassaaq, Pinngortitaleriffimmit ilisimatitsissutigineqarpoq.
Taratsup ilisimatuussutsikkut Issittup imartaani suliassat suugaluartulluunniit naammassisinnaassavai, atortorissaarutinillu amigaateqarnani, soorlu qalorsuarnik natersiutinik kalissinnaavoq, qalut immap ikerani aalisarnernut atortut atorlugit immap ikerani aalisarsinnaavoq, atortorissaarutit nutaaliaasut atorlugit aalisagaqatigiiaat oqimaassusinngorlugu amerlassusiat uuttortarsinnaavai aammalu immap naqqa kilometerini arlalialissuarni sukumiisorujussuarmik assiliortorsinnaassavaa, nunap assingatullu assiliorneqarsinnaalersillugu.
Umiarsuaq Tarajoq inuttanik aqqaneq marlunnik inissaqartitsivoq, ilisimatusartartut 20-t
saniatigullu Imarsiornermik Ilinniarfimmiit ilinniartunik ilaasoqartarsinnaassalluni.