- Ajunngivissumik ingerlasimavoq. 

Esani A/S-imi pisortaaneq Frank Rasmussen taamatut oqarpoq. 

Eqqagassalereqatigiiffimmit Tunumi illoqarfinni nunaqarfinnilu aamma Qaqortumi eqqakkannik piffissami kingullermi katersisoqarsimavoq. Eqqakkat katersorneqareermata Københavnimi Amagerbakkemukaanneqarput, tassani nungutinneqassallutik.

Esani A/S-imit aappassaanik katersisoqaleruttorpoq. Umiarsuaq Qqertarsuup Tunuaniissimavoq, Ilulissaniissimalluni Kommuni Qeqertalimmiissimallunilu. Umiarsuaq maannakkorpiaq aappassaanik Danmarkip tungaanut ingerlaarpoq.

- Illoqarfiit nalunaarutigisimasaminnit eqqakkanik amerlanerusunik tunniusserusussimagaluarput - tamannalumi pitsaasuuvoq. Arlallit eqqakkanik poortuilluartalereerput, tamanna pitsaasuuvoq tamanullu ilinniutaalluni, pisortaaneq oqarpoq. 

Annikitsunik unammilligassaqartoq

Frank Rasmussenip ilisimatitsissutigaa, kommunit eqqakkanik qanoq annertutigisunik tunniussinissartik pillugu aallaqqaammut  erseqqinnerusumik oqaaseqarsinnaasarsimanngillat, Taassumali oqarneratut:

- Aggertugut takusinnaagaangamikku, kommunit eqqakkanik poortuilluarlutillu umiarsuarmik usilersueqataasarput. Maannamut suliarineqartut pitsaalluinnarnerat nuannersumik tupaallaatigaara.

Pisortaanerup erseqqissaassutigaa, eqqakkanik katersiniarnermi suli annikitsunik unammilligassaqartoqartartoq, imali ajornartiginngillat iluarsiiffigineqarsinnaanatik. Taassuma nassuiaatigaa, Esani A/S-imit neriuutigineqarsimasutut illoqarfiit nunaqarfiillu ilaanni eqqakkanik poortuisarneq pitsaavallaarsimanngitsoq: 

- Soorunami pitsaanerusumik poortuisarnissaannik oqaluuttarsimavagut. Sumiiffiit ilaanni aamma arriippallaalaartumik umiarsuaq usilersorneqartarpoq. Tamanna allatut aaqqiissutissarsissavarput.

Ikuallaavik

Esani A/S-imit illoqarfiit kingulliit, tassunga ilanngullugu Sisimiut neriorsuutigineqarsimasutut anguneqassapput. Frank Rasmussenip oqaatigaa, Nuummi ikuallaaviit marluk pingaartumillu Sisimiuni ikuallaavissaq atoriaannanngorpata ajornartorsiummut aaqqiissutaassasut. 

- Tamatuma takutippaa, tamanna naatsorsuutigisimasatsinnit ajornannginnerusoq. Piareersarsimanertut taaneqarsinnaavoq.

Frank Rasmussenimit naatsorsuutigineqarpoq, Nuummi ikuallaavissaq 2024-p aallartinnerani atoriaannanngorsimassasoq, maannali ikuallaavissap 2024-mi ukiakkut aatsaat atoriaannanngornissaa isikkoqartoq.