Umiarsualivimmut pilersaarut: Umiarsuit takornariartaatit ima tikilluaqqusassavagut
Umiarsuit takornariartaatit ukiuni kingullerni amerlatsikkiartuinnarnerat qanoq pilersaarutigineqarnerat, Sikuki Nuuk Harbourip oqaluttuaraa.
Umiarsualivitoqaq containerinut inissiisarfiusimasoq qaammatini tulliuttuni annertuumik allanngortitserneqassaaq, taamaasilluni umiarsualivitoqqami takornarissat 17.000-it 2018-imi umiarsuarnut takornariartaatinut ilaallutik Nuummut tikinnissaannik ilimagineqartut tikissinnaalissapput.
Piaartumik pisariaqartitsineq
- Umiarsualivimmut piaartumik nutaanik suliniuteqartariaqarpoq, taamaasiornikkut takornariat umiarsuarnik takornariartaatinik tikittut pitsaanerpaamik sinaakkuteqarnissaat qulakkeerneqassaaq, ilaatigut sillimaniarnermut piumasaqaatinut naammassinnittumik, umiarsualiviup pisortaa John Rasmussen, Sikuki Nuuk Harbour A/S, Sermitsiaq.AG-mut paasissutissiivoq.
Ukioq manna illoqarfinniit angisuunit mikinerusuniillu 30-riarluni tikittoqarnissaa isumaqatigiissutaareerpoq.
Sikuki ukiuni kingullerni umiarsuit takornariartaatit angallannermit umiarsualivimmilu naliginnaasumik suliaqarnernit takornarissat akornuserneqannginnissaat anguniarlugu, pitsaanerpaamik sinaakkuterneqarnissaannik pilersaarusiorsimavoq. Pilersaarut umiarsualivimmi siulersuinit marlunngormat akuerineqarpoq.
Ulapippugut
- Suliaq aallartereerparput, sanaartukkallu nutaat kingusinnerpaamik junip qaammataani naammasserusukkatsigit ulapittorujussuuvugut, John Rasmussen oqaluttuarpoq. Umiarsuit takornariartaatit tikittarnerat maajip qaammataata naanerani juunillu aallartilaarnerani aallartittarpoq oktobarillu qaammataata tungaanut tikittarlutik.
Pulaartarfimmik pilersitsisoqassaaq, taanna takornarissat umiarsuarmit niunerminiit siullertut naapitassarissavaat. Illutassaq 135 kvadratmeteriussaaq containerinullu qulingiluanut atatinneqassalluni, tassani takornarialerinermik suliaqartartut allaffimmik nioqqutinik misigisassanillu
tuniniaaffigisinnaasaannik pilersitsisinnaanissaq periarfissaassaaq.
- Aammattaaq sumiiffimmi perusuersartarfinnik pilersitsissaagut, umiarsualiviup pisortaa, talittarfiup aqqusernullu akornanni bussinut amerlanerusunut inissaqarnerulissasoq tikkuarlugu, paasissutissiivoq.
Umiarsuarmi ingerlatseqatigiifiup Kommuneqarfik Sermersooq suleqatiglugu pilersaarusiorsimavoq, ilaatigut takornariat ajornannginnerusumik tummeqqanukarsinnaanissaat pillugu titarnilersuisoqassalluni, tummeqqat nutarsarneqarlutillu allilerneqassapput.
Tummeqqat allilerneqarniartut
- Tummeqqat puttasulerlugit nutarsarneqarlutillu allilerneqassapput, taamaasilluni umiatsiat angissussaat apeqqutaallutik marluk pingasulluunniit inissaqassapput. Puttasup aamma qulakkiissavaa takornariat umiatsianut ikaartarnerat ajornannginnerulerlunilu isumannaannerulernissaa, John Rasmussen oqarpoq.
Umiarsualivimmut pilersaarut eqaallunilu allilerneqaqqissinnaasoq
- Umiarsualivimmi suliniutigut pisariitsunik aallartissavagut, taakku pisariaqartitsineq malillugu inerisarneqarsinnaassapput. Suliniummi nutaamik neriuutigaarput umiarsualimmi illoqarfimmilu takornarialerinermik suliaqartartut pikkorillutillu piumassusillit ataatsimut isigalugu kaaviiaartitaasa amerlanerulernissaat, John Rasmussen oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...