Sisimiut
Umiarsualivimmik assersuinissamut aalisartut piareeqqasut
Saarulliit tunitsiveqarnerat pitsaanerulernissaat anguniarlugu Sisimiuni aalisartut umiarsualivimmik assersuinissamut piareersimapput
- Saarulliit tulaanneqarsinnaasut taama annikitsigitillugit akiillu taama appasitsigitillugit, inuussutissarsiutaasinnaanera killilerujussuuvoq, tamannalu aalisartut inuussutigisinnaannginnamikku soorunami naammagittaalliuutigaat, Sisimiuni Aalisartut Piniartullu Peqatigiiffiata siulersuisuini ilaasortaq Leif Fontaine KNR-imut oqarpoq.
Aalisariutit annerit ulloq allortarlugu saarullinnik 2 tonsinik tulaassisinnaapput, umiatsiaararsortullu aamma ulloq allortarlugu 400 kiilunik tulaassisinnaallutik. Taamatulli aaqqissuussisoqarnera imminut akilersinnaanngitsoq aalisartut peqatigiiffiata SAPP-ip oqaatigaa.
Sisimiuni Aalisartut Piniartullu Peqatigiiffiata, Aalisarnermut Naalakkersuisumut Karl-Kristian Krusemut ammasumik allagaqaateqarput. Pissutsit aaqqiivigineqanngippata akerliussutsiminnik takutitsiniarnertik umiarsualiviulluunniit assersorneqarnissaanik aamma pilersaaruteqarput.