Umiarsualivimmi siulersuisut akissarsiakinnerulersut
Sikuki Nuuk Harborip ukiumut angusai 2016-imi 2 millionit koruuninit amigartoorutaariarlutik akileraareernermi 8,5 millionit koruuninut sinneqartoorutinngortinneqarput. Siulersuisut akissarsiaat millionip affaanik ikileriaateqarlutik.
Piginneqatigiiffiup ileqquusumik Nuummi sisamanngormat ataatsimeersuarnerani tamanna paasinarsivoq.
Angusat naammagisimaarneqarput
Angusat ilimagisamit pitsaanerupput taamaammat umiarsualiviup siulersuisuisa siulittaasuat Lars Karlssoni naammagisimaarinnippoq, naak umiarsualivittaaq pilersaarutaasumit kingusinnerusumik atorneqaleraluartoq.
Septembarip 22-ani containerinut inissiisarfik ammaanersiorneqarpoq taamaalilluni Kalaallit Nunaanni sanaartortitsinerit annersaasa ilaat piareerneqarluni.
Containerinut inissiisarfittaaq piginneqatigiiffimmut allamut attartortinneqarpoq: Royal Arctic Line. Umiarsualivitoqarlu maanna amma ineriartortinneqarpoq, soorlu umiarsuarnut takornariartaatinut tikeraarneqarsinnaanngortinniarneqarluni.
Siulersuisut qinigaaqqipput
Siulersuisut tallimanik inuttaqartut qinigaaqqipput, akissarsiaalli annikillingaatsiarlutik. Ukiuni kingullerni pingasuni containerinut inissiisarfittaassap ulapputigineqarnerani akissarsiaat qaffanneqarnikuunikuusimallutik.
Siulersuisut akissarsiaat ataatsimut isigalugit 525.000 koruuninik ikilisinneqarput, siulersuisuni siulittaasup ukiumut akissarsiai 350.000 koruuninit 150.000 koruuninut apparneqarlutik. Siulittaasup tulliata akissarsiai 175.000 koruuninit 75.000 koruuninut apparneqarput ilaasortallu pingasut ukiumut 125.000 koruunisisarsimagaluartut maanna 50.000 koruuninik akissarsisalissallutik.
Containrinut inissiisarfik piareeriarpat sulineq annikillissasoq siulersuisut siorna ileqquusumik ataatsimeersuarnermi ilimiasaarneqareernikuupput.
Sanaartornermi kinguaattoorneq
Umiarsuaatileqatigiiffiup aningaasartuutaasimasut suli aaqqinniartussaassavaat. Per Aarsleff Grønland piumasaqarsimavoq piffissalerneqarnerunissamik annertusisamillu akilerneqarnissamik.
- Tamannali Sikuki Nuuk Harbour A/S-imit akueriumaneqanngilaq innersuussutigineqarluni isumaqatigiissutaasumi kingusinaartumik tunniussinermi sanaartuisup akiliuteqartussaatitaanera, ukumut nalunaarummi allassimavoq.
Tamanna isumaqatigiissitsiniartartoq atorlugu aaqqinniarneqassasoq naatsorsuutigineqarpoq. Qaquguli pissanersoq paasissutissiissutigineqanngilaq.