Umiarsualiviit matuneqarnissamut aarlerinartorsiortut
Nunatsinni umiarsualiviit ulapaarfiunerpaartaasa pingaaruteqarnerpaartaasalu ilaat, assersuutigalugu Aasianni Maniitsumilu, aserfallatsaaliinissamut iluarsaassinissamullu aningaasaliissutinik amerlanernik nassaartoqanngippat, matuneqarnissamut aarlerinartorsiortut akornanniilissapput. Tamanna 2021-mut aningaasanut inatsisissatut siunnersuummi atuarneqarsinnaavoq.
Nunatsinni umiarsualiivit aserfallatsaalineqarnissaannut iluarsaanneqarnissaannullu aningaasaliissutinik amerlanernik ukiut tulliuttut qulit ingerlaneranni nassaartoqanngippat, umiarsualiviit arlallit isumannaallisaaneq pissutigalugu matuneqarnissamut aarlerinartorsiussapput. 2021-mut aningaasanut inatsisissatut siunnersuummi taama allassimasoqarpoq.
- Aningaasat pissarsiarineqanngippata iluarsaassinissamut kinguaattoorutinut akiligassaq kinguartinneqaannassanngilaq kisiannili aamma akisunerulersinneqassalluni, ajoqutit aserfallatsaaliineq kinguartinneqarsimatillugu ajornerulersarmata, allassimasoqarpoq.
Umiarsualivinnulli immikkoortortaqarfik umiarsualiviit aserfallatsaalineqarnerannik nakkutiginnittuusoq iluarsagassat pisariaqarnerpaartaannik taamaallaat pingaarnersiuisariaqartarsimavoq, umiarsualivinnut talittarfinnullu ukiumut aningaasaliissutaasartut aserfallatsaaliinissamik pisariaqartitsinivimmut matussusiissutissatut naammaqqajartanngimmata tamatumalu peqatigisaanik siunertanut allanut umiarsualivinnut attuumassutilinnut aamma aningaasaliissutaasartussaallutik.
Illoqarfinni anginerusuni arlalinni atuisut akiliuteqartinneqartalernissaannik periarfissamik maannakkorpiaq misissuisoqarpoq. Atuisut akiliutaasa umiarsualivinni taakkunani ingerlatsinermut, aserfallatsaaliinermut aningaasaleeqqinnernullu aningaasalersuissutaasinnaanissaat anguniagaavoq.
Sanaartugassanut aningaasaliissutit taamaalillutik nunatsinni umiarsualivinnut minnerusunut, atuisut akiliutaasa ingerlatsinermut, aserfallatsaaliinermut aningaasaleeqqinnernullu aningaasartuutinik matussusiisinnaanissaasa ilimanaateqarfiginngisaannut, atugassatut pingaarnersiorneqarsinnaassapput, aningaasanut inatsisissatut siunnersuummi allassimasoqarpoq.
Naalakkersuisut atuisut akiliuteqartinneqartalernissaannik siunnersuummik tigussaasumik suliaqarput, aamma Aningaasaqarnermut Naalakkersuisoq Vittus Qujaukitsoq umiarsualivinnik matusisoqarnissaanik ernummateqanngilaq. Taanna isumaqarpoq, pissutsit ilungersunarpallaalersinnagit aningaasalersuinisasq inissinneqassaqqaartoq, taanna Sermitsiaq.AG-mut paasissutissiivoq.