Disko Line

Umiarsuaatileqatigiiffiup assortuussutaasup Kommune Kujalleq akissuteqarfigaa

Kommune Kujallermi borgmesteri Kiista P. Isaksen (S) immikkoortunik tallimanik Disko Linemut isornartorsiorpoq. Maanna umiarsuaatileqatigiiffiup taakku akissuteqarfigai.

Disko Line, Najaaraq Ittuk

- Disko Linep siunertarinngisaannarpaa innuttaasut assigiinngisinnissaat, akerlianilli maannakkut akitigut aaqqissuussinikkut aqqut ungasinnerusoq atorlugu angalanissaannik periarfissinniarsarisimavai akitsorsaatitaqanngitsumik apuussinnaatillugit.

Disko Linep pisortaa Finn Hansen borgmesterimut Kiista P. Isaksenimut akissuteqarluni taama allappoq, taassuam umiarsuaatileqatigiiffik isorntartorsiornikuuaa. Naalakkersuisut 'akuliuttariaqarput Disko Line A/S-imullu piumasaqaateqarlutik Kujataani angalasut assigiinngitsumik pineqassanngitsut' tamanna piumasarinikuuaa.

Pisortap Finn Hansenip isornartorsiorneq tusaasimallugu aamma akigitinneqartut allanngortinneqassanersut misissussallugu Namminersorlutik Oqartussanik oqaloqatiginninnermik aallartitsiniarlutik oqaatigaa.

- Tamannaluunnit aqqutit ungasinnerusut akisunerulernissaannik kinguneqassagaluarpat, pingaarnerummat arlaannaalluunniit eqqunngitsumik pineqartutut misigisimannginnissaa. Tamanna imatut kinguneqariaannaavoq, Nanortalimmi inuttaasut Qaqortoq aqqusaaqqaarlugu Narsarsuarmukartut akiliuteqarerulernissaat, Finn Hansen uparuaavoq.

Atuaruk: Kommune Kujalleq: Kujataani angallannermi ajornartorsiutit suli annertupput

Isornartorsiorneq paasisinnaanngikkaa
Bilitsit allanngortinneqarsinnaanerinut Kujallermit isornartorsiorneq Disko Linep paasisinnaanngilaa.

- Ulloq aallarfissaq sioqqullugu nal. 16:00 tungaanut billitsit tamarmik 75 kr-nik akiluteqarnikkut utertinneqarsinnaapput, tamatumalu kingorna nutaamik billitseqqittoqarsinnaalluni. Tamakku tamarmik annertunngitsumik akiliuteqarluni internetsikkut pisariitsumik nammineq ingerlanneqarsinnaapput. Utertitsinermut akiliuteqartitsinermut peqqutaavoq pinngitsoortikkumangatsigu innuttaasut angalavissanut inissanik amerlavallaannak pisariaqanngitsumik inniminniinissaat. Borgmesterip allakkiaa isumaqalersitsivoq, Disko Line iluarisaannarminik angalasussat nussortarai, tamannali ilumuunngilluinnarpoq, Finn Hanse akissuteqarpoq.

Taassuma oqaatigaa, helikopterip aallarnissaa taamaatinneqartillugu, Disko Linep sulisuisa ilaasut neqeroorfigisarpaat angalanerat angallammut nuunneqarsinnaasoq, tamannali kissaatigineqanngippat angalaneq taamaallaat ingerlaqqissinnaavoq helikopterip aallarnissamut inissalimmut tullermut. Tamannaavorlu angalasussap naggataatigut nammineq aalajangigassaa.

Angalasussap angallammut nuunneqarnissaq akuerippagu Sullissinermut isumaqatigiissutit malillugit akip nikingassutaa angalasussamut utertinneqarsinnaanngilaq, Disko Line helikopterinut angallateqarnermullu ingerlatsinernut aningaasartuuteqarmat.

Uppernarsaatinik ujartuisoq
Allakkat nassiussallu qaammatip affaanik kinguaattoorsinnaasarnerinik isornartorsiuinermi, allakkat imaluunniit nassiussat Disko Linemut anngunneqartut taama sivisutigisumik kinguaattoortinneqarneq ajortut Finn Hansenip akissuteqarfigaa.

- Borgmesterillu tamanna aalajangiusimappagu uppernarsaatissaminik saqqummiussaqaqqullugu kaammattussavarput, taanna oqarpoq.

Finn Hansenip maalaarutit allat erseqqissaqqullugit Kiista P. Isaksenimut kaammattuivoq.

Kisianni sullissinissamut isumaqatigiissutit ilaatigut ullualunnguit piffissaralugit aallartittariaqarnikuunerat, tamatumalu kingunerisaanik aallarnisarnermi aporfissaqarsimanertik, taassuma assortunngilaa.

- Aasalli ingerlanerani kinguaattoornernut aaqqiissutissanik suliniutinik assigiinngitsunik allartitsisimavugut, maannakkullu isumaqarpugut nunatsinni innuttaasut amerlasuutigut suliniutitsinnut naammagisimaarinnitsut, Disko Linep pisortaa Finn Hansen oqarpoq.

Powered by Labrador CMS