Umiarsuaatileqatigiiffiit: Unioqqutitsilluta pisassaateqanngilagut
Hans Enoksenip umiarsuaatileqatigiiffinnik unioqqutitsilluni pisassiissutaateqarneraanera, Royal Greenlandip aamma Polar Seafoodip ilumuunnginnerarpaa
Hans Enoksenip (PN) arlaleriarluni oqaatiginikuuaa: Umiarsuaatileqatigiiffiit angisuut unioqqutitsillutik raajartassanik pissarsisarput. Taamatulli oqarneq ilumuunngilaq, Royal Greenland aamma Polar Seafood naqissusiipput.
Sermitsiaq taama allaaserisaqarpoq.
Naalakkersuisoqatigiit isumaqatigiissutaat atsiorneqarmat Hans Enoksenip kingullermik tamanna oqaatigaa, kingornalu Sermitsiaq.AG-mut itisilerlugu.
Kisianni uteqattaarneqaraluaruniluunniit tamanna ilumuunngilaq, Polar Seafoodimit tamanna oqaatigineqarpoq.
- Inatsisit killissarititaasa iluani sulivugut, unioqqutsitsinikuunngilavut, taamaammallu pisassat pillugit Namminersorlutik Oqartussat uagullu akunnitsinni aaqqitassaqanngilaq. Unioqqutitsilluni ingerlatsisoqarneraaneq paatsooqatigiinnermik aallaaveqarsimassassaaq, Henrik Leth, Polar Seafoodimi siulersuisuni siulittaasoq Sermitsiamut oqarpoq.
Royal Greenlandimi aamma pisortap, Jens K. Lyberthip unioqqutitsilluni pisassiissuteqarnernik oqariartuuteqaqattaarnerit tupigusuutigai.
- Politikerit kaammattorusuppakka, unioqqutitsisoqarsimaneranik ilimatsaassaqarsimagunik, Namminersorlutik Oqartussani naalakkersuisoqarfinnut aammalu nakkutilliinermik suliaqartitanut saaffiginneqqullugit, suummi tamarmik inatsisit malillugit ingerlanneqarnissaannik qulakkeerinninniarnermi taakku nakkutilliisussaapput, taanna Sermitsiamut oqarpoq.
Umiarsuaatileqatigiiffiit marluk aalisarnermut inatsisissap ilusilersorneqarnerani Naalakkersuisunngortussat oqaloqatiginissaat qilanaaraat.
Pisassiissutit pillugit oqallinneq Sermitsiami saqqummertumi kingullermi paasisaqarfiginerusinnaavat: