Ulrik Josefsen toquvoq

Ulrik Josefsen sisamanngorneq maajip 15-at toquvoq ulloq taanna atorfimmini Ineqarnermut Naalakkersuisoqarfimmi sulisimalluni. Taamaammat toquneranik nalunaartut ilaqutaasunut suleqataasunullu tupannarsimavoq.

Ineqarnermut naalakkersuisoq Siverth K. Heilmann Atassummeersut eqqaaniummik imatut allappoq:

'Assut aliatsaatigisatsinnik Ineqarnermut Naalakkersuisoqarfimmi sulisuusugut, sisamanngornermi 15. maj 2014 ilisimatinneqarpugut asasarput ikinnguterput suleqaterpullu Ulrik Josefsen toqukkut qimagussimasoq.

Inuunerup nalunarluinnartuunera pisussallu eqqoriaruminaatsuuneri Naalakkersuisoqarfimmi sulisuusugut eqqaasinneqarpugut, tassami ulloq taanna pisarnitsitut suliffitsinni nuannisarluta Ulrik suleqatigigatsigu. Pisarnermisut nuannaarlunilu saaffigiuminarpoq, taamatuttaaq pisarnermisut peqqissaarluni angusaqarluarnissarlu siunertaralugu suliani isumagivai. Ulrik nuannaartuugami avatangiisiminut nuannaartitsisaqaaq suleqatinilu suliassaminnik naammassinninniarnerannut nukissanik tunioraasuulluni – amerlasuutigut piffissaasuaneq atuuttaraluartoq. Naalakkersuisoqarfimmi suliassavut pillugit Ulrik ilisimasalerujussuuvoq misilittagartuujullunilu, taamatuttaaq piareersimajuaannarpoq ikiuutissalluni. Taamaammat suliffitsinni ulloq taanna suna tamarmi pissusissamisut ingerlavoq. Taamaammat toqukkut qimagussimasoq ilisimatinneqaratta assorsuaq tupaallatsinneqarpugut, aammalu uagutsinnut assut paasiuminaassimaqaaq suleqammik taamak pitsaatigisumik, tunniusimatigisumik aammalu suliassaminik ilisimaarinnitsigisumik annaasaqarnerput.

Ulrik Josefsen Ineqarnermut Naalakkersuisoqarfik nutaamik pilersinneqarmat 5. november 2013-mi ulloq taanna Naalakkersuisunngorama uattulli Naalakkersuisoqarfimmi nutaatut sulilerpoq. Tamanna sioqqullugu Ulrik pisortat suliassaqarfiini ukiorpassuarni sulisuuvoq, Namminersornerullutik Oqartussani, Namminersorlutik Oqartussani aammalu Nunatsinni Kommunini.

Piffissami sivikitsumi suleqatigiilluarnitsinni, Ulrik Josefsen-ip immikkoortortaqarfimmi pisortatut sulinermini akisussaaffigisani pitsaalluinnartumik ingerlappaa. Peqqissaartuaannarpoq, piareersarluarsimajuaannarpoq aammalu oqareernittut suliassaminik akisussaaffimminillu ilisimaarinnilluinnartuulluni. Apeqqut sunaluunniit mikisuunnguugaluarpat imaluunniit annertugaluarpat pisariullunilu, Ulrik oqaloqatigineqarsinnaajuaannarpoq, aammalu sutigut tamatigut naatsorsuutigiuaannarsinnaasarparput ineqarnermut sanaartornermullu tunngasutigut suliassatsinnik naammassinninniarnitsinni aammalu Kalaallit Nunaanni innuttaasut toqqammavissilluarneqarnissaannik Naalakkersuisut anguniagaqarnitsinni.

Taamaammat uanga aammalumi Ineqarnermut Naalakkersuisoqarfimmi suleqatigiiulluta tamatta suleqatitsinnik annertuumik annaasaqarpugut assorsuaq taartissarsiniaruminaattussamik.

Ineqarnermut Naalakkersuisoqarfimmiittugut tamatta, Ulrik Josefsen-ip nulianut, qitornaanut, ernutannguanut, ilaqutaanut allanut qanigisaanullu uummammit pisumik misiginneqataanerput matumuuna apuupparput', Siverth K. Heilman allappoq.

Ulrik Josefsen pingasunngornermi Nuummi ilisaavoq.