Ullut tamaasa inisimaffissamik isumakuluuteqartuartoq
Paamiormiu Mia Nielsen Enoksen 27-inik ukioqarpoq, ukiunilu marlunngortuni angerlarsimaffeqanngitsutut inuuvoq. Siorna panimminik arsaagaavoq, initaarunilu aatsaat utertissinnaavaa.
Paamiut 1.308-nik inoqarpoq. Kalaallit Nunaanni angerlarsimaffeqanngitsunik 2022-mi kisitsinermi Paamiuni inuit 33-t angerlarsimaffeqanngitsuusut nalunaarsorneqarput. Taakku ilagaat Mia Nielsen Enoksen. Maanna suliffeqanngilaq qatserisartutulli februaarimi pikkorissarnermi kingorna qatserisartunngoqqammivoq.
Aviisi Sermitsiaq taama allappoq.
- Ullumikkut illooqqanni tukkuvunga, neriuppunga aamma tukkoqqissinnaassallunga, Mia Nielsen Enoksen oqarpoq.
Paamiuni INI A/S 266-inik inissianik attartortakkanik ingerlatsivoq, inuillu attartornissaminnut utaqqisut januaarimi 2023-mi 108-pput. Attartornissamut utaqqisut agguaqatigiisillugu ulluni 228-ni utaqqisaraluarput. Mia Nielsen Enoksen maanna ukiut marlunngorpai angerlarsimaffeqanngitsutut inuuleramili, INI A/S-imilu utaqqisut allattorsimaffianni suli normu 25-iuvoq. Inimik neqeroorfigineqarani angerlarsimaffeqanngitsutut inuunini sivitsormat nanertuutigisalerpaa, eqqunngitsumillu pineqarnini nilliaatigerusulerlugu.
- Ullut tamaasa ilungersortarneq, tarnikkut sakkortulaartorujussuusarpoq. Ingammik angerlarfissaqanngeriataaraangama. Inoorusukkunnaarneq tunniutiinnarusuttarnerlu misigisalertarlugit. Nalunngisannut sianeqattaartarpunga tukkusinnaanerlungalu aperalugit, Miap oqaatiginiakkani isumaliuutigeqqaartarlugit nassuiaaniarsarivoq. Tukkuffissaqanngilluinnaraangamilu ernguttut ornittariaqartarpai, Paamiunimi angerlarsimaffeqanngitsunut ornittagaasimasoq inunnut innarluutilinnut najugaqarfissiatut allanngortinneqarmalli kingorna angerlarsimaffeqanngitsunut ornittagaqaleqqinngilaq.
Allaaserisaq tamaat Sermitsiami saqqummersumi kingullermi atuaruk, uani:
