status

Ullut siulliit 100-t

Naalakkersuisut siulittaasuat Aleqa Hammond ullut siulliit 100-t pillugit tallimanngormat tusagassiortunik katersortitsivoq

Tallimanngormat nalunaaqutaq 13.30 Naalakkersuisut siulittaasuat Aleqa Hammond Naalakkersuisut ullut siulliit 100-t atuunnerat pillugu Nuummi Hans Egedep Illuani tusagassiortunik katersortitsivoq. Tusagassiortunik katersortitsinermi Naalakkersuisut anguniagaat ullunilu 100-ni siullerni naalakkersuisut angusimasaat pillugit Aleqa Hammond oqaluttuarpoq.
Naalakkersuisut ilisaritinneqarput. Aleqa Hammond oqaluttuarpoq isumaginninnikkut ajornartorsiutit akiornissaannut pilersaaruteqartoq. Kinguaassiuutitigut atornerlunneqarsimasut pitsaanerusumik ikiorneqartassapput, imminornerillu pitsaanerusumik akiorniarneqalissapput.
Aleqa Hammond ilanngullugu oqarpoq innarluutilinnik ikiuineq nukittorsarneqassasoq.
Oqaatigineqarpoq suliffissaaleqisut 4808-niit 3492-inut ikileriarsimasut, tikkuarneqarlunili tamanna sukkasuumik allanngorsinnaasoq.
Urani assortuussutaasoq aamma eqqaaneqarpoq. Tamatumani Naalakkersuisut siulittaasuat oqarpoq uranimut akuersaannginneq najoqqutassaq pisoqalisimasoq, ikinnerpaamillu nunat 30-t uranimik piiaasut. Naqissuserpaa Kalaallit Nunaanni uranimik piiaaneq innuttaasunut uloriananngitsumik ingerlanneqassasoq.
Tamatuma saniatigut Aleqa Hammond oqarpoq tulluusimaarutigalugu aalisartut 1500 koruuninik akiliutigisartagaat naalakkersuisut atorunnaarsissimammassuk. Aammalu illut pitsaanerusumik aserfallatsaalinissaannut qisuinnaanngitsut periarfissat allat isiginiarneqartariaqartut.
Qanoq isumaqarpit - ulluni siullerni 100-ni Aleqa Hammond qanoq angusaqarsimava?
Ulluni 100-ni siullerni Naalakkersuisut sunik angusaqarsimanersut Sermitsiami sapaatip akunnerani saqqummersumi atuaruk. Aviisi pisiariuk uani:

Powered by Labrador CMS