Ullup unnuallu ingerlaneranni nalunaarusiamit: Inummik pisuinnarmik aportittoqartoq ajunaalernermilu kalerrisaarummik aallartitsisoqartoq
Tallimanngornerup arfininngornerullu akornanni unnuakkut Nuummi inummik pisuinnarmik aportittoqarpoq, imigassartorsimalluni biilertoq aporsisuulluni. Politiit aamma ajunaalernermi kalerrisaarummik Qinngutsinni aallartinneqartumik suliami ilisimannittussarsiorput.
Kalaallit Nunaanni Politiit tallimanngornerup arfininngornerullu akornanni unnuakkut pisunik imigassamut attuumassutilinnik, ilaatigut imigassarsortimallutik biilertunik arlalinnik, nalunaaruteqarput.
Nuummi imigassartorsimallutik biilertut marluk politiinit nalunaarsorneqarput, pisullu aappaa illoqarfiup qeqqani Aqqusinersuarmi pisuinnaap nal. 04.25 aportiffigisaanut attuumassuteqarluni.
Biilertoq imigassartorsimasoq paasineqarpoq pigaartullu pisortaat Carl Sværd naapertorlugu, pisuinnaq aportittoq annikitsuinnarmik ajoqusersimalluni. Biilertoq tigusarineqarpoq, pasisatut unnerluutigineqarluni kingornalu iperagaalluni.
Sisimiunibiilertoq aqqusinermi qullilerfimmut aporsimavoq, tassanilu imigassartoqarsimaneq aamma pissutaasimasoq paasinarsilluni. Biilertoq tigusarineqarpoq, kingornalu killisiorneqareerlunilu misissugassamik aaversereerami iperaalluni.
Ajunaalernermi kalerrisaarut aallartinneqartoq
Pigaartut pisortaat aamma oqaluttuarpoq, politiit tallimanngornermi unnukkut saaffiginnissuterpassuarnik tigusaqarsimasut, qaqqap Ukkusissap nalaani ajunaalernermi kalerrisaarummik Nuummi innuttaasorpassuit takusaqarsimammata.
- Politiit Qinngutsinnut apuummata, innuttaasoq apummik nivattoq naapippaat, taassumalu angutit aalakoortut pingasut ajunaalernermi kalerrisaarummik aallartitsisut takusimavai, Carl Sværd oqaluttuarpoq.
Inuit taakkua pingasut kinaassusiinik ilisimannittut politiinit attavigineqarusupput, ajornartuuissimanngikkaanni ajunaalernermi kalerrisaarutinik aallartitsineq inerteqqutaammat.
- Tamatuma ikuallalernermi kalerrisaarummik toorsineq assigaa, Carl Sværd oqarpoq.