Ullumikkut 60-iliisoq: Ileqquliussanik allanngortitsisoq

Daniel Thorleifsen ukiuni 15-inngulersuni Nunatta Katersugaasiviani Allagaateqarfianilu Nuutoqqami isikkivigeqisumi allaffeqarpoq. Katersugaasivik oqaluttuarisaanermi ilinniarsimasumit, Thorleifsenimit ullumikkut 60-iliisumit aqunneqarpoq.

Katersugaasivimmi anguniarneqartoq, tassaavoq Kalaallit Nunaata tikinneqaqqaarneraniit ukiut 4500 matuma siornamiit, nunasiaataanermut massakkullu inuunermut oqaluttuarsinnaanissaq. Suliaq ataqatigiisaarinermik annertuumik piumasaqaateqarfiusoq.

Piffissaq naligisaq paasineqassappat, taava oqaluttuarisaaneq paasisimasaqarfigineqartariaqarpoq. Oqaaserineqartoq atorunnaarsinneqarnissaa Daniel Thorleifsenimit aamma politikkikkut tunngassuteqartuni oqaaseqartinneqartartumit aarleqqutigineqarpoq. Oqaluttuarisaanermik ilisimasaqannginneq nuannareqqusaarnermik pilersitsisartoq, soorlu politikerit qineqqusaarnerminni neriorsuutitik piviusunngortinngikkaangamikkit. Inuiaqatigiittut pitsaanerusumik ingerlalissagutta, taava oqaluttuarisaanerput ilinniarfigisariaqarparput.

Daniel Thorleifsen Upernavimmi inunngorpoq, ataataalu KGH-mi niuertuusimalluni anaanaa angerlarsimaannartuusimalluni. Daneil Thorleifsen ilaqutariinni siullersaalluni ilinniarnertuunngorniarfimmi naammassivoq Kalaallit Nunaannilu oqaluttuarisaanermi ilinniarsimasuni siullersaalluni. Ileqquliussamik allannguisuuvoq. Tamanna pisinnaasimavoq angajoqqaaminnit tapersersorteqarnermini. Angajoqqaajusummi isumaqarsimapput meerartik ilinniarsimasuusariaqartut.

Aarhus Universitetimi ilinniarnini naammassigamiut seminarieadjunktitut Ilinniarfissuarmi atorfinippoq. Tassanngaanniillu Ilisimatusarfimmut nuulluni, siullermik adjunktitut kingusinnerusukkullu Inuiaat Kulturiat Oqaluttuarisaanerani lektorinngorluni, 2005-imi massakkut atorfigisaminut atorfininnginnermini.

Daniel Thorleifsen inuiaqatigiinni akuulluarnera ilaatigut atuakkioqataanerani takuneqarsinnaavoq. Taannami ilaatigut kalaallit meerartaat 22-it Danmarkimut misiliutaallutik aallartitaasimasunut misissueqataavoq. Soorlu aamma qallunaat nunasiaateqarsimaneranut tunngatillugu oqaluttuarisaanerat misissuiffigissallugu peqataaffigigaa.

Taassuma saniatigut misissuinerit assigiinngitsut peqataaffigisimavat, soorlu ilaatigut kalaallit silassusaanut tunngatillugu oqaluttuarisaaneq aamma Kalaallit Nunaanni politikkikkut aalassassimaarnerit, immikkut isiginiagassaavoq 1990-ikkunni namminiilivinnissamut Kalaallit Nunaat sukasarnera.

- Daniel Thorleifsen immikkut inissitassaanngilaq. Taanna nunatta katersugaasivia pingaarutilimmut inissisimalernissaa kinaassuseqalernissaalu sulissutigisimavaa, Christian Schultz-Lorentzen, naalakkersuineq pillugu oqaaseqartartoq aamma AG-mi aaqqisuisuunerusoq oqarpoq nangillunilu:

- Qanga pisut ullumikkullu pisut sammineqartarput. Imarisaq aallaavigalugu tamanut ammasumik allannguiniartoqartarpoq. KNR-ikkullu qineqqusaartoqaleraangat naalakkersuineq pillugu oqaaseqarluartarluni. Ilisimasat imarisaqarluartut tassani tunniunneqartarput. Oqaluttuarisaanermi ilisimasaqarluartoq ullumikkullu pissutsinut soqutigisalik.