Ullumi aalajangiisoqassasoq: Kikkut Folketingimi Kalaallit Nunaannut sinniisuussappat?
Ullumi qinersiviit nunami tamarmi ammarneqassapput, qinersisartullu kikkut Folketingimi Kalaallit Nunaannut sinniisuussanersut aalajangissavaat.
Ministeriuneq Mette Frederiksen (Soc.) Folketingimut qinersisoqarnissaanik oktobarip tallimaani nalunaaruteqaropoq, sapaatillu-akunnerini sisamani qineqqusaarneq ullumikkut naammassineqassalluni.
Kingullermik 2019-imi juunip tallimaani Folketingimut qinersisoqarpoq, qinigaaffillu nalinginnaasumik ukiuni sisamani atuuttarluni. Mette Frederiksenili qinersinissamut suli piffissanngitsoq qinersisoqarnissaanik nalunaaruteqartariaqarsimavoq, tassani Radikale Venstrekkut Socialdemokraatit ikinnerussuteqarlutik naalakkersuisuutitaqarnerannut tapersersuerusukkunnaarmata.
Nunami maani peqqinnissaqarfik kiisalu sillimaniarnermut illersornissamullu politikki qineqqusaarutigineqarluarsimapput, qineqqusaarutigineqarsimasullu Sermitsiaq.AG-mi ilanngutassiarineqartarsimasut atuarnerusinnaavatit.
Qinigassanngortittut 15-it
Partiinit assigiinngitsunit arfinilinneersut katillutik 15-it qineqqusaarlutik sassarsimapput, qinersisartullu ullumi aalajangiiffigissavaaat, kikkut qinigaaffimmi tulliuttumi Folketingimi Kalaallit Nunaannut sinniisuussanersut.
Qinigaasut marluk qinersisoqareernerani ingerlaannartumik sunniuteqarsinnaapput, tassa Danmarkimi naalakkersuisuutitassanik pilersitsiniarnermi qitiusutut inissisimalersinnaagamik. Isumasiuisimaneq kingulleq naapertorlugu qinigaasoq ataasiinnaq sunniuteqarsinnaavoq, Kalaallillu Nunaannit qinigaasut marluk Savalimmiunilu qinigaasoq ataaseq Folketingimi partiinut saamerliusunut amerlanerussuteqartitsilersinnaallutik.
Folketingimi ilaasortassat katillugit 179-iusut qinigaasussaapput, tassani Kalaallit Nunaat Savalimmiullu tamarmik immikkut marlunnik isertitaqassallutik.
Maani nunami kommunit qinersisoqarneranut atatillugu suliassanik isumaginnittartuupput, tassungalu tunngassuteqartut kommunit nittartagaasigut nassaarineqarsinnaallutik.
Politiit qinersisoqarnissaanut aamma piareeqqasut, pigaartut pisortaat Bruno Brix marlunngornerup ullaavani Sermitsiaq.AG-mut ilisimatitsivoq.
Politiit qinersivinnik nakkutilliissapput, taamaammat qinersiviit ilaanni politiinik najuuttoqartarsinnaavoq.
Ministeriuneq taasisimasoq
Danmarkimi nalunaaqutaq malillugu qinersiviit marlunngornermi nal. 08 ammarneqarput, politikkikkullu siuttut arlallit taasereersimallutik - taakkununnga ilaalluni ministeriuneq Mette Frederiksen.
Ritzau naapertorlugu Mette Frederiksenip angorusutaraa, qinersisoqareerpat partiit saamerliit talerperliillu qeqqanniittunik naalakkersuisuutitaqartoqarnissaa.
- Siammasissumik suleqatigiittoqarnissaa neriuutigaara, Værløsemiittumi Hareskovhallenip saavani tugassiortunut taamatut oqarpoq.
Mette Frederiksenip oqaluttuaraa, Socialdemokraatit naggatissaa tikillugu tamaviaarniartut.
- Naggatissaa tikillugut tamaviaassaagut. Qinersinermi matumani taaguunneqartut amerlaqqatigiingajalluinnarsinnaapput, taanna oqarpoq.