Ullukinneq pisortatigoortumik nalliuttorsiutigineqartalissaaq
Nunap nammineerluni ullorsiorfeqalernissaa Peter Olsenip nuannaarutigaa
Kalaallit Nunaat ullunik 13-inik pisortatigoortumik ullorsiorfeqartarpoq; ullulli taakku kalaallit namminneerlutik ullorsiorfissatut atuutsitarilerpaat, tassa Inuattut Ullorsiorneq. Ullut ullorsiorfiit sinneri nalliuttorsiorfiupput imaluunniit Danmarkimiit pigiliussaallutik.
Nunali immikkut ullorsiorfeqalissaaq, ullorlu taanna ileqqunut attuumassuteqassalluni. Tassa ullukinneq. Tamanna Peter Olsenip (IA) nuannaarutigaa, ullukinnerummi pisortatigoortumik ullorsiorfinngortinnissaa siunnersuutigaa.
- Siulitsinnit kingornussatta ilagaat ullukinnersiortarneq, ullormilu tassani siulitsinnit seqernup qummut aallaqqinnera nalliuttorsiutigineqartarsimavoq. Seqineq tarrilluni kaperlaleraangat, unnia taamani itsarsuaq siulersuagut isumaqartarsimasut seqineq kivisartoq, tassalu aasassaarluni qaammassaarluni ukiuujuaannalertussanngortartoq - seqineq tassa nueqqinngisaannassalluni tarrittartoq , tusagassiutinut nalunaarummini allappoq.
Aassuutit seqineq qullarteqqittarpaat
Aassuutit ulloriai marluusut, tassalu Altair aamma Tarazed, upperisatoqqami qitiulluinnartuusut, Peter Olsen nassuiaavoq.
- Siulersuagut isumaqartarsimapput taakku ulloriannguit Aassuutit seqineq kiviartortoq ataaniit ungoortarsimagaat qummullu aallartillugu, unnialu ukiut tamaasa seqerngup ammukarnerani Aassuutit sillimasarsimasut, killissanilu tikikkaagangu ungoortarsimagaat, qummullu aallaraangat Aassuutit inummut takutittartut, inuit nuannaaqqullugit, silarsuaq qaammariartuleqqissammat.
- Taamaattumik inuit aassuutisiornissaminnut atisartaartortarput, takkukkaangatalu unnia ukiivinni tamani qassimiuaartarput mamartuinnarsuarnillu nerrittarsimallutik.
Ileqqutoqaq atoqqilissaaq
Peter Olsenip siunnersuutaa malillugu, Naalakkersuisut peqquneqarput kingusinnerpaamik 2020-mi ullukinnerup pisortatigoortumik ullorsiorfinngortinneqassasoq. Ullorsiortanerli maannakkut atuleqqeriiginnarsinnaavoq, siunnersuuteqartoq isumaqarpoq.
- Piusivut inuusivut ileqquvullu uummarissaqitsigit. Ullukinnermi qaamarngup seqernullu inuunitsinnut pingaruteqarluinnartuunerat uppernarsarneqarluni nalliussineqartarpoq.
- Taamaattumik 21.december ullukinnersiorluarnissassinnik kissaappaassi, qanortoq ulloq taanna qassimiuaarluarisi, nutaanillu atisartaartuullusilu mamartorsuarnik nerrilluarisi, Peter Olsen inuulluaqqusivoq.