Ulluinnarni immikkoortitsineq atorunnaarsinneqartariaqarpoq
Akuersaarneqarsinnaanngilaq nikassaanerullunilu. Taama Karen Banke Petersenip Sorømi Menymi misigisaa, nunaqqatinilu marluullutik kalaallisut oqalunnertik pissutigalugu avoqqaarineqarfigisaat, Christiansborgimi politikerit isumaqatigiillutik oqaatigaat.
Sorømi Menymi kalaaleq pisiniartitsisoq pissusissamisoortumik inunnguuseralugu oqaatsiminik oqalulerpoq nunaqqatini Karen Banke Petersen lottomi eqquiniummik pisiniarluni karsimut takkummat. Kisianni pisiniartitsisoq qullersaminit taamaalioqqusaanngilaq, taassumami taakkua marluk qinnuigai qallunaatut oqaloqqullugit. Tamanna Karen Banke Petersenip nittartakkanut inuit attaveqatigiittarfiinut attaveqalissutigaa, pisorlu ingerlaannaq eqqumaffigineqartorujussuanngorluni. Ajoraluartumik ulluinnarni immikkoortitsineq tamanna, Karen Banke Petersenip misigisaa, qaqutigoortuunngilaq.
Aviisi Sermitsiaq allappoq.
Danmarkimi kalaaliuneq ilungersunarluinnartuuvoq. Taama atuakkiortoq oqallissaarisartorlu Nauja Lynge oqarpoq. Taanna isumaqarpoq, Danmarkimi kalaallinut immikkoortitsineq nalinginnaasumik unammilligassaasoq. Assiliaq Christiansborgimi politikerinit arlalinnit uppernarsarneqarpoq, taakkualu immikkoortitsineq pillugu ilisimasanik annertunerusunik immikkoortitsinerullu akiorniarlugu iliuusissatut pilersaarutinik ujartuipput.
Martin Lidegaard
– Kalaallit qallunaanit pissusilersornermik nikassaataasumik immikkoortitsinermillu taama ittumik naapitaqartarnerat kanngutsiallaatigisorujussuuara. Tamanna inunnut ataasiakkaanut annernartuuvoq, aammali Kalaallit Nunaata Danmarkillu akornanni attaveqatigiinnermi annernartuulluni.
Martin Lidegaardip folketingimilu ilaasortat allat qanoq oqaaseqarsimanerat Sermitsiami sapaatip-akunnerani matumani saqqummersumi atuakkit, ugguuna iserfigisinnaavat: