Ullorsiornermi takutitsineq: Mattuttoq aalakoortoq illartitsingaatsiartoq
Piitannguaq Alaufesen quiasaarisartutut arfininngormat ukiunik 30-nngortorsiornerminut atatillugu kulturikkut illorsuarmi Katuami takutitsivoq. Ullormi tassani marloriarluni takutitsivoq, tamatigullu isiginnaartunik ulikkaavittarluni.
- Ulloq immikkuullarippoq. Iterama qujamasunnerujussuaq misigivara. Qujamasuutigisakka tassaapput ilaquttakka aammalu aliikkusersuisartuuninni inuit uannut pingaaruteqartut. Killitsigaarama ullormut arlaleriarlunga qullipitsiartarpunga allaallu scenemut avalannissannut sivisujunnaartoq aamma taamaaseqqillunga, Piitannguaq Alaufesen oqaluttuarpoq.
AG aqangu pingasunngornermi saqqummertussaq allappoq.
Qaqutigoorluinnarpoq inuup kiserrammi inersuarmi inunnik ulikkaavissumi nalunaaquttap akunnerini marlunni aliikkusersuisarnera. Ilanngulluguli eqqaasariaqarpoq Henrik Høyer Jensen marlussoriarluni nipilersorluni akunniliitsiartarmat, aliikkusersuinerulli sinnera Piitannguaq Alaufesenip kiserrammi isumagaa.
Mattuttoq vodkalu 3 liiteri
Pingaartumik mattuttuusaarluni aalakoortuusaarnera isiginnaarianik illartitsilaavissorpoq. Mattuttorooq scenemut avalatsigani vodkamik 3 liiterimik imereersimavoq.
- Mattuttoq aalakoortoq isumassarsiaraara inuit aalakoortut assigiinngitsutigut naammattoortarnikuugakkit. Aalakuuleqqaarnermi inuit ilaat asannittorujussuusinnaapput malugisimaaleriartornerminnili kamaqqajaaleriartortarlutik. Ilaat aalakuungaatsialeraangamik nillialersarput. Takusarnikuugama inuit aalakoortut ilaat igalaaq ammaannariarlugu suaartartut ilaallu matortik ammarsinnarlugu suaartartarlutik kamassuataartarlutik, Piitannguaq Alaufesen oqaluttuarpoq nangillunilu:
Illoqarfinnut amerlanernut aliikkusersuiartussamaartoq
- Quiasaarusiakka suliarisarpakka inunnit tarrarsorfigineqarsinnaanngorlugit. Mattuttuusaarama illartorpassuupput. Aamma imaasinikuugakku matuttoq oqaasipilunnermut maqaasitillugu, tamannalu inuit quiagilluinnarpaat, Piitannguaq Alaufesen oqarpoq .
Illoqarfinni allani aamma aliikkusersuissamaalerpoq. Qanittumi Qasigiannguani, Ilulissani Sisimiunilu aliikkusersuissamaarpoq. Aasamut sumiiffinni allani aamma aliikkusersuissamaarpoq .