Ullormut tulaassuisoqannginneraniit 40 tonsinik tulaassuinermut

Aalisartut Sisimiuni aalisakkanik tunisinissamut periarfissaat nutaat, saarulliit nerpiinik tunisassiornermut nutaamut tunngaviusut, Naalakkersuisut umiarsuarnik tunitsiviliissagaluarpata aserorneqarsinnaapput, Royal Greenlandimi pisortaq, Jens K. Lyberth, naliliivoq.

Aalisartut Sisimiuni tulaassuivissakinneraallutik naammagittaalliorsimapput umiarsualiisoqarnissaanillu noqqaassuteqarlutik, tamannali Jens K. Lyberthip eqqumiigaa.

Sisimiut eqqaanni aalisarneq ukioq manna pitsaalluinnarpoq, Royal Greenlandillu tunisassiarisinnaasai sinnerlugit aalisartoqarluni. Saarullinniarneq sapaatip-akunneri sisamat arfinillilluunniit ingerlaneranni appariartussaaq, Royal Greenlandilu taamanikkornissaanut nunami annerpaamik tunisassiorusuppoq, taamalu nerpiiaavik nutaaq atorluarneqarniassammat suliffissanillu nutaanik pisariaqartinneqaqisunik atorluaalluni, suliffeqarfissuaq tusagassiorfinnut nalunaarummi paasissutissiivoq.

- Royal Greenlandip saarullinnik tunisassiorneq aningaasaliiffigalugu inerisaavigaa Paamiuni, Maniitsumi, Sisimiuni aammalu Kangaatsiami tunisassiornermi 220-nut suliffissaqartitsisumik aallartitsilluni siornatigornillu amerlanerusunik aalisartunik tulassuisoqarluni, Jens K. Lyberth paasissutissiivoq.

Saarullinnik tunisassiorneq nutaaq, Royal Greenlandimit aallartinneqartoq, poliitikerit annertunerusumik nunatsinni tunisassiatigut ineriartortitserusunnerannut suliffissaqartitserusunnerannullu naapertuuttoq, imminut akilersinnaasunngorsinnaavoq nunattalu sinneranut siaruarterneqarsinnaalluni. Akerlianik Kalaallit Nunaanni tulaassuivissatut umiarsualiinerit nunami tunisassiornerup ineriartornissaanut kinguarsaassapput, Jens K. Lyberth naliliivoq.

- Royal Greenland ukioq manna aalajangerpoq angallat uumatitsivik Maniitsumiit Sisimiunut illuartinniarlugu, taamaasillutik aalisartut saarullinnik uumasunik tulaassuisinnaaniassammata, aalisakkallu suli uumatillugit tunisassiorfimmut ingerlateriarlugit nerpiiaavimmi nutaami 40-nik nutaanik sulisulimmi tunisassiarineqarsinnaaniassammata. Royal Greenlandip siusinnerusukkut aalisartut tallimat tulaassuisussatut isumaqatigiissuteqarfigai, marluinnaalli isumaqatigiissutiminnik eqquutsitsipput.

- Taamaammat aalisartut Sisimiuni tulaassuivissakinneraallutik isornartorsiuinerat Royal Greenlandimit paasiuminaatsinneqarpoq. Pissutsit piviusut aallaavigalugit Royal Greenlandi tulaassuisarnerup tungaatigut pitsanngorsaavoq, ukiut pingasut matuma siorna tulaassuisoqanngilluinnarneraniit ullumikkut ulloq unnuarlu 40 tonsinik tulaassuisoqarsinnaalersillugu tunisassiorfinni pingasuusuni, Sisimiut illoqarfianni, Sarfannguami aammalu Itillimi, Jens K. Lyberth paasissutissiivoq.