Ullormut nalunaarusiaq: Nuummi timersortarfimmut tillinniartoqarlunilu oqaluffimmut serlersaarisoqartoq
Ataasinngornerup unnuaani Nuummi Illorsuaq Timersortarfimmi aningaasaasivimmik tillittoqarpoq. Politiillu ullormut nalunaarusiaanni aamma Sisimiuni oqaluffimmi igalaaq aserorneqarsimasoq oqaluttuarineqarpoq.
Ataasinngornerup unnuaani nal. 04.15, Nuummi Illorsuarmi Timersortarfimmi cafeteriami kalerrisaarut aallartissimasoq Kalaallit Nunaanni Politiit nalunaarfigineqarput.
Pigaartut pisortaat Peter Bauer, Sermitsiaq.AG-mut taama oqaluttuarpoq.
Politiit maannamut misissuinerat naapertorlugu timersortarfimmut tillinniartoqarsimavoq, aningaasaasivillu cafeteriamit tillinneqarsimavoq.
Sumiiffimmit videonik immiussanik peqartoq, Peter Bauer oqaluttuarpoq, taakkulu politiit suliami misissorpaat.
Nukappiaqqat politeeqarfiliaanneqartut
Politiit ullormut nalunaarusiaanni aamma sapaammi pisoq oqaluttuarineqarpoq, tassani politiit angalaartut Sisimiuni oqaluffiliartinneqarput, igalaaq ujaqqamik aserorneqarsimammat.
Pisoq sapaammi ullaap tungaani nal. 11 missaani pivoq, politiillu oqaluffiliarmata nukappiaqqat pingasut ukiukitsut attaveqarfigaat, politiillu oqarnerat naapertorlugu taakku serlersaarisimapput.
Nukappiaqqat taakku pingasut politeeqarfiliaanneqartut, pigaartut pisortaata oqaluttuaraa, tassungalu angajoqqaavinit kiisalu paaqqinnittarfimmit sulisumit aaneqarput.