Ullormut nalunaarusiaq: Angut meeqqamik atornerluisimasutut pasineqartoq
Angut apriilip 13-ata tungaanut tigummigallarneqartussanngorpoq, meeqqamut kannguttaatsuliorsimasutut pasineqarluni. Tamatuma saniatigut politiit aamma weekendimi ikuallattumut ornigupput, taamatullu angut politeeqarfimmut mannimmik milloormat aserorterisutut unnerluutigineqarluni.
Upernaviup nunaqarfiisa ilaanni angut weekendimi meeqqamut kannguttaatsuliortoqarneranik suliami tigusarineqarpoq.
Kalaallit Nunaanni Politiini pigaartut pisortaat, Peter Bauer, Sermitsiaq.AG-mut taama ilisimatitsivoq.
Peqqinnissaqarfimmit saaffiginninneq tunuliaqutigalugu politiit suliaqarput, tassani meeraq misissorneqarsimavoq. Angut tamatuma kingorna arfininngornermi tigusarineqarpoq, meeqqamik pinngitsaaliisimasutut pasineqarluni 13. apriilip tungaanut tigummigallarneqartussanngorpoq. Angut pasilliummut qanoq qisuariarnersoq ilisimatitsissutigineqanngilaq.
Illuaraq ikuallattoq
Kannguttaatsuliortoqarneranik suliap saniatigut politiit sapaammi ulloqeqqaanerani nunaqarfimmi Oqaatsuni Ilulissat eqqaanni ikuallattumut ornigupput.
Sunngiffimmi illuararineqartoq, illuaqqamilu inoqanngitsoq, pigaartut pisortaat oqaluttuarpoq.
- Ikuallattoq piaaraluni ikuallatsinneqarpasinngilaq. Kiassaat tassani pissutaasimagunarpoq, Peter Bauer oqarpoq.
Politeeqarfimmut manninnik milloortut
Arfininngornerup unnuaani politiit Nuummi aamma suliaqarput, tassani arnaq tigusarineqarpoq, politiinullu nakuusertutut unnerluutigineqarluni.
Arnap aapparisaata tigusarinninneq ajoraa, politeeqarfimmullu arlaleriarluni sianerpoq, arnallu iperagaanissaa piumasaralugu.
Iluatsinngimmat politiit oqarnerat naapertorlugu angutip inuusuttut politeeqarfiup isaariaanut manninnik milloortippai. Angullu aserorterisutut unnerluutigineqarpoq.