Ulloq unnuarlu paaqqinnittarfimmut nutaamut ataatsimiititaliaq itigartitsivoq
Ulloq unnuarlu paaqqinnittarfik nukappiaqqanut arfineq-pingasunut inissaqartussaq, illup nunaminertamik atugassiissutaata paaqqinnittarfimmut allanngortinnissaanut qinnuteqaat itigartinneqarpoq. Qinnuteqartoq allamut qinnuteqartariaqassaaq, ataatsimiititaliaq oqarpoq.
Kangillinnguit 1-mi Nuummi Nuussuarmi nukappiaqqanut arfineq-pingasunut ulloq unnuarlu paaqqinnittarfiliornissamut qinnuteqaammut, Kommuneqarfik Sermersuumi Sanarfinermut Avatangiisinullu Ataatsimiititaq itigartitsissuteqarpoq. Kommunimi ingerlatsiviup qinnuteqaatip akuerineqarnissaa inassuteqaatigigaluaraa itigartitsisoqarpoq.
Kommunimut pilersaarummi paaqqinnittarfiit sumi inissinneqarnissaasa aalajangerneqartarnissaat kissaatigineqartoq, ataatsimiititaq itigartitsinermini allappoq.
- Suliami uani qinnuteqartoq sumiiffimmut allamut qinnuteqarnissamut periarfissaqarpoq, ataatsimiititaq oqarpoq.
Nukappiaqqat arfineq-pingasut sulisullu 10-12-it
Ingerlatsivimmi inassuteqaammi atuarneqarsinnaavoq, ulloq unnuarlu paaqqinniffik nukappiaqqanut arfineq-pingasunut 12-iniit 14-inut ukiulinnit najugarineqassasoq.
- 10-12-inik sulisoqassaaq, ullukkut 2-4-t sulisassapput paarlakaallutik, unnuakkullu marluk.
- Najugaqartut tamarmik meeraapput nalinginnaasumik atuartut, taakkulu meeqqatut allatut taamatut ukiulittut illoqarfimmi sunngiffimmi sammisassaqartitsiniutinut assigiinngitsunut ilaasarput. MH Enterprises qinnuteqartuuvoq, taannalu inissianik attartortitsisarpoq, paaqqinniffittaanik ingerlatsineq ulloq unnuarlu paaqqinniffimmit imminut pigisumit Aqissermit ingerlanneqassaaq, nassiuaammi allaqqavoq.
Illumi tassani ulloq unnuarlu paaqqinnittarfiliornissamik pilersaarut, sumiiffimmi paaqqinnittarfeqareermat eqqaamiorineqartunit akerlilerneqarsimasoq, allakkani takuneqarsinnaavoq:
Eqqaamiut isornartorsiuisut
- Maannakkut ulloq unnuarlu paaqqinnittarfimmut eqqaamiorisanit tusarniaanermut akissutini allassimasoqarpoq immikkoortumi eqqissiviilliorneq misigineqartartoq, tassa politiit akulikitsumik orniguttarput. Tamanna pillugu akerliliissuteqartut immikkoortumi ulloq unnuarlu paaqqinnittarfiit ilaqqinneqarnissaat kissaatiginngilaat, ingerlatsivik tusarniaarnermut akissutit pillugit taama allappoq.
Matumani qinnuteqaammi aalajangersimasumi meeqqanut 12-14-inik ukiulinnut najugaqatigiiffik qinnuteqaatigineqartoq, ingerlatsiviup oqaatigaa, aamma meeqqat immikkut pisariaqartitsisuunersut ilisimaneqannginnerarpaat:
- Taamaattumillu qinnuteqartumit maanna ulloq unnuarlu paaqqinniffimmi pioreersumisut ajornartorsiuteqartoqarnissaa naatsorsuutigisariaqarparput, ingerlatsivik taama naliliivoq.
Kisianni politikerit itigartitsipput, taamaattumillu paaqqinnittarfiliorniartut piviusunngortitsissagunik sumiiffimmik allamik nassaartariaqassapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...