Ulloq unnuarlu nalunaarusiaq: 80-inik ukiulik sioorasaarneqarpoq – angut aningaasarpassuarnik piumasaqartoq
Angut 25-nik ukiulik sisamanngornermi unnukkut Paamiuni pisup kingorna tigusarineqarpoq, tassani angut utoqqaq sioorasaarneqarpoq. Nuummi politiit arnamik 19-inik ukiulimmik 15-inik ukiulimmut nakuusertumik tigusarinnipput.
Kalaallit Nunaanni Politiit sisamanngornermi unnukkut Paamiuni pisoq pillugu nalunaarfigineqarput, tassani angut 80-inik ukiulik sioorasaarneqarpoq.
Pigaartut pisortaat Ole Hald, Sermitsiaq.AG-mut oqaluttuarpoq.
Politiit suliamik misissuinerat naapertorlugu, angut 25-nik ukiulik Paamiuni Kirkegaardsvejimut ornigussimavoq.
Aningaasarpassuarnik piumasaqartoq
Taanna 80-inik ukiulimmit aningaasarpassuarnik piumasaqarsimavoq. Aammattaaq 25-nik ukiullip angut 80-inik ukiulik aningaasanik pissarsinngikkuni aallaammik atugassaminik peqarluni ilisimatissimavaa.
25-nik ukiullip tamanna pissarsissutiginngilaa, sumiiffillu qimassimallugu. Nalunaarutiginnittoqarnerata kingorna politiit angut nassaaraa, nal. 19.25 tigusarinnipput. Politiilli aallaammik nassaanngillat.
Pigaartut pisortaata oqarnera naapertorlugu, angut tunngaviusumik inatsit naapertorlugu killisiorneqarumasimanngilaq, apersorneqarnermi kingorna sioorasaaraluni tillinniarsimasutut pasineqarluni iperagaarusuppoq.
19-inik ukiulik nakuuserluni tigusarineqartoq
Ulloq akissarsiffiugaluartoq aamma unnuakkut inuit amerlagaluartut, unnuaq eqqissisimaffiusimasoq, pigaartut pisortaat nangilluni oqaluttuarpoq.
Nuummili marlunnik tigusarinnittoqarsimavoq.
Arnaq 19-inik ukiulik niviarsiaqqamut 15-inik ukiulimut nakuusersimasutut tigusarineqarpoq. 19-inik ukiulik kingusinnerusukkut iperagaavoq.
Tamatuma saniatigut angut aalakoorpallaartoq kiisalu hashimik annertunngitsumik paarisaqartoq tigusarineqarpoq.
