Ulloq Air Greenlandimut alianartoq
Air Greenlandimi sulisut 60-it ullumi soraarsitaanissamut allakkamik tigusaqarput. Allaffimmi sulisut, timmisartortartut tunisassiornermilu sulisut, Air Greenlandimi pisortanit soraarsitaanissamut allakkanik tunineqaqqamerput.
Air Greenland corona pissutigalugu, sipaarniarfigisinnaasaminit annertuumik sipaarniartariaqalersimavoq. Tassa ukioq kaajallugu atorfiit katillugit 111-it atorunnaarsinneqarput, taakkunannga 60-it ullumikkut soraarsinneqartut aalajangersimasumik atorfeqarlutik. Sinneri atorfiupput inuttaqanngitsut, taakku inuttalerneqaqqissanngillat aamma piffissami sivikitsumi atorfiusartut inuttalerneqassanngillat, Air Greenlandimit ilisimatitsissutigineqarpoq.
- Angalanissanut pilersaarutigut naleqqussarpagut aammalu sipaarutissanik arlalippassuarnik aallartitsilluta, kisiannili ajornartoorneq annertuvoq, aammalu sulisutsinnik pikkorissunik soraarsitsiortornissaq avaqqussinnaanngilarput, tamannalu alianartorujussuuvoq, Air Greenlandimi pisortaaneq Jacob Nitter Sørensen oqarpoq.
225 millioninik sipaaruteqartoqassasoq
Timmisartuutileqatigiiffik maajip aallartinnerani nalunaarpoq, coronamit ajornartorsiuteqarneq qaangerniarlugu sulisunik 75-it 100-llu akornanni amerlassusilinnik soraarsitsiniarlutik. Peqatigitillugu nalunaarutigaat, katillugit 225 millioner koruuninik sipaaruteqartoqassasoq. Aningaasat tunisassiornermik annikilliliinikkut, nalinginnaasumik sipaarniarnikkut piginnaasatigullu naleqqussaanikkut, tassunga ilanngullugu atorfinnik atorunnaarsitsinikkut nassaarineqassasut.
Ukiumut atorsiit atorunnaarsinneqartut sulisunullu tunngatillugit aningaasartuutaasartut allat, sipaarutigineqartut tamarmiusut 30 procenterivaat, Air Greenalndimilu ukiumut atorfiit tamarmiusut 20 procenteralugu.
Angalasut ikileriarnissaat naatsorsuutigineqartoq
Ingerlatseqatigiiffiup nunap iluani atlantikorlu ikaarlugu angalasartuisa amerlassusaat aappaagu 30-35 procentimik ikileriassangatinneqarput, taakku ingelatseqatigiiffiup kaaviiaartittagaasa tamarmiusut annersaraat. Taamaammat Air Greenland unammillersinnaassutsini attatiinnarsinnaaniarlugu minnerpaamik 225 millioner koruunit nalingannut sipaaruteqarfissarsiussaaq, Air Greenland sisamanngornermit tusagassiorfinnut nalunaaruteqarnermi ilisimatitsivoq.
- Suliami tassani atorfillit kattuffiillu sulisut ilaasortaaffigisaat qanittumik suleqatigaagut, tamatumalu kingunerisaanik ataatsimoorluta sipaarfigisariaqakkagut nassaarisimalerpagut. Pissutsit ilungersunaraluartut sulisut ataatsimut aaqqiissutissat ajornakusoortut, pisariaqavissulli nassaariniarlugit tunniusimalluinnarlutik suliniuteqarnerat pillugu nersortorujussuuakka. Tamanna ajornartorsiornerup matuma qaangiunnerani, nunap imminnut atatittuarnissaanut aamma Air Greenlandip nukittunissaata qulakkeerneqarnissaanut tunngaviussaaq, Jacob Nitter Sørensen oqarpoq.