Ullaakkut makissinnaasut amerlanerussapput!
Inatsisissatut siunnersuut nutaaq naapertorlugu pisortanit ikiorsiissutinik pisartagaqartut saniatigut aningaasarsiorsinnaasariaqarput – isumaqatigiissutinullu takkutinngitsoorunik pillarneqarsinnaassallutik. Anguniagaq paasinarpoq: Sulineq akilersinnaassaaq.
Sulineq taama peqqinnartigippat, sooq taava napparsimasunut tunniunneqassanngila?
Quiasaarutitoqaq taama nipeqarpoq.
Aviisi AG taama allappoq.
Ilumoortortaqalaarsimagunarporli. Naalakkersuisummi qularinngilaat, inuit amerlanerusut pilersorneqarnermiit makinnissamut tunngavissamut – akissarsiaqarluni sulinermut – nuunnerpata tamanna innuttaasut peqqissusaannut ataasiakkaallu ilorrisimaarnerannut iluaqutaassasoq.
Ajornartorsiulli imaassimavoq, sulineq ilinniakkamilluunniit aallartitsineq kikkunnut tamanut akilersinnaasarsimanatik. Ilinniagaqarsimanngitsut sulinermikkut isertitaasa angerlarsimaannarnermiluunniit pissarsiarisartagaasa assigiinngissutaat annikippallaarsimavoq.
Tamannali Naalakkersuisut qanoq iliuuseqarfiginiarpaat. Naalakkersuisut qaammammi matumani inatsisissatut siunnersuummik, pisortanit ikiorsiissutinut sinaakkutinik annertuumik allanngortitsisussamik, tusarniaassuteqalerput. Tusarniaaneq septembarip 24-anut killeqarpoq.
– Aaqqissuussineq pisortanit ikiorsiissutinik pisartagaqartut sapinngisamik imminnut pilersugarilernissaannut sunniuteqaqataassaaq. Tamanna ilaatigut pisortanit pilersuinermut ikiorsiissutinit allanit appasinnerusunik aalajangersimasumik akigititaqarnikkut - pisariaqarpallu tapeqartitsinikkut – tapersersorneqassaaq.
– Sulineq imminut akilersinnaasariaqartoq pisortanit ikiorsiissutit aaqqissuusseqqiffigineranni tunngaviulluinnarpoq. Sapaatip akunneranut nalunaaquttap akunnerini ikittuinnarni sulisarneruppat, aapparisap inooqatigisalluunniit sulinissamut kajumissuseqarnera pineqarpat imaluunniit meeqqanut pilersuisuni sulinissamut kajumissuseqartoqarneq pineqarpat tamanna atuuppoq. Taamaammat pisortanit ikiorsiissutit ima qaffasitsigissanngillat sulinani angerlarsimaannarneq akilersinnaanerussalluni,Naalakkersuisut inatsisissatut siunnersuutiminni paasissutissiipput.
Aviisimi AG-mi atuarnerusinnaavutit. Aviisi uani pissarsiariuk: