Uku meerai ajornartoornermi paaqqinniffinniissinnaapput
Kikkut tamat meeraat ajornartoornermi paaqqinniffinniissinnaanngillat. Aningaasaqarnermut naalakkersuisoqarfik tunngaviusumik malitassanik allattorsimasuuteqarpoq. Angajoqqaap angerlarsimaffimmi sulisinnaasup meeqqani angerlarsimaqatigalugit paarissagai ilanngullugu malittarisassaatinneqarpoq.
Sulisut inuiaqatigiit unittuunngivinnissaannik suliaqartut, ajornartoornermi paaqqinnittarfinnik atuisinnaapput.
Inuiaqatigiinniliuna pingaarutilimmik kikkut suliaqartuusut, meeqqaminnik paaqqinnittarfinniititsisinnaasut.
- Inuiaqatigiinni pingaarutilinnik kikkorpiaat sulisuunersut, inuiaqatigiinnilu pingaarutilinni sulisutut isigineqartariaqarneq pillugu, aammalu sulisut taakku meeraasa paarineqarnissaannut tunngatillugu kikkut aalajangiisarnersut kiisalu sulisunut taakkununnga meeqqanut paarsititsinermut piginnaatitaaffiit apeqqutigineqarnikuupput, aningaasaqarnermut naalakkersuisoqarfimmit allakkiami allassimavoq.
Naalakkersuisoqarfik inuiaqatigiinni pingaaruteqartunik suliallit pillugit malittarisassanik suliaqarsimavoq:
- ”Nunatta aningaasatigut unittuunnginnissaa” sapinngisamik attatiinnarneqassaaq. Imaappoq, pingaartumik suliffeqarfiit namminersortunit pigineqartut nalinginnaasumik ingerlatsinertik sapinngisamik attatiinnassavaat.
- Pisortat suliffeqarfii pingaarutillit ukununngali (killiligaanngitsumik) peqqinnissaqarfik, pilersuineq akissarsianik tunniussineq, attatiinnarneqassapput.
- Suliniutit naapertuuttuunissaat anguniarneqassaaq, taamaalilluta Coronamik nalaataqarneq anigorutsigu inuiaqatigiittut sapinngisamik piaartumik aallarteqqinnissarput qulakkeerniassagatsigu.
- Qanorluunniit meeqqeriviit atuarfiit allallu matuneqaraluarpata, kommunit meeqqat angajoqqaavi inuiaqatigiinni pingaarutilinni atorfeqartut ajornartoornermi paarsititsinissaannik neqerooruteqarput.
- Tamanna sulisoq inuiaqatigiinni pingaarutilimmik atorfeqarnersoq pillugu aqutsisumut tamakkiisumik aalajangiiffigisassanngortinneqarpoq. Taamaattumik sulisut ataasiakkat tamanna namminneq aalajangissanngilaat.
- Sulisut, inuiaqatigiinni pingaarutilinni atorfeqartutut (paasitinneqarsimasut), namminneq meeqqaminnik paarsinissartik pillugu suliffimminni najuutinngippata, suliffimmiit peqquteqarani sulinngitsoornertut isigineqassaaq, aningaasarsiaqaatigineqassananilu.
- Aappariinni, aappaasoq inuiaqatigiinni pingaarutilimmi atorfeqarpat, aappaalu pisortat suliffeqarfiutaannit angerlartitaasimasoq imaluunniit angerlarsimaffimmi suleqquneqarpat, taava aappaasup, suliffimminit angerlartitaasimasup meeqqat paarisariaqarpai.
- Tunngavissatut saqqummiunneqartut maannakkut Nuummiinnaq atuupput. Aamma taakkua illoqarfinni allani, pisortat suliffeqarfiutaasa pisortatigoortumik matuneqarneranni, allannguuteqartoqarnerani atuutissapput, aningaasaqarnermut naalakkersuisoqarfimmit nalunaarutigineqarpoq, erseqqissarneqarlunilu malittarisassat ataavartumik annertusiartortinneqarsinnaasut.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...