Ukrainep Savalimmiut russinik niueqateqarunnaarnera iluaquserniaraa
Savalimmiormiut kapisilittaminnik Ruslandimut tunisaqartarunnaarpata, kapisilinnik tunisassiortartut Ukrainemi pitsaanerpaamik atugassaqartinniarlugit Ukrainemi oqartussat sapinngisaminnik iliuuseqarniarput. Taamatut oqarpoq Ukrainemiut ambassadøriat Mykhailo Vydoink.
Savalimmiuni naalakkersuisut nalunaarutigisimavaat, EU-p Ruslandimut pillaatitut iliuuseqarnera malinneqassasoq. Inuussutissat umiarsualivinnillu mattussinerit EU-mit pillaatitut iliuuserisanut suli ilanngunneqanngillat, taamaammat Savalimmiuni naalakkersuisut mattussinernik suli aallartitsisoqarsimanngilaq.
Kapisilinnilli tunisassiortut ilaasa Europami suliffeqarfippassuit allat assigalugit russinik niueqateqateqarnissamut isumaqatigiissutitik atorunnaarsissimavaat. Bakkafrost aamma Hiddenfjord Ruslandimut tunisisarnerminnik unitsitsisimapput, niueqatigisinnaasaminnillu allanik nassaarniartussaallutik.
Savalimmiuni suliffeqarfiit - Kitaani suliffeqarfiit allat assigalugit - iluaquserneqassapput, Ruslandimut taarsiulugu Ukrainermut tunisaqartarusuppata, Mykhailo Vydoink taamatut isumaqarpoq.
- Ukrainemi naalakkersuisut suliffeqarfinnut Ukrainemi suliaqarsinnaasunut akileraarutitigut iluaqutaasinnaasunik nutaanik, suliffeqarfinnut aningaasaliissuteqarnermi iluaqutaasinnaasunik neqeroorutissanik suliaqarlutik aallartsereerput. Savalimmiuni suliffeqarfit Ukrainemi suliaqarnissaannut pitsaalluinnartunik piumasaqaatinik neqeroorfiginiarpavut. Ruslanimik niueqateqarunnaarnerannut taarsiissutitut iluaquserneqassapput, Mykhailo Vydoink oqarpoq.
Sorsorsunneq sioqqullugu kapisileqarpallaarsimanngitsoq
Mykhailo Vydoink ukiut pingasut matuma siornatigut Savalimmiuniissimavoq. Taamanikkut kapisilinnik tukertitsisartut arlallit oqaloqatigisimavai, Ukrainemullu kapisilinnik tunisaqartalersinniarsimagaluarlugit.
Paasitinneqarsimavoq tamanna pisinnaanngitsoq, Savalimmiuni kapisilinnik tukertsisinnaanerit killeqarnerat pissutigalugu. Maannali Ukrainemi periarfissamik takunnittoqarsimvoq.
- Kajumissaarutigerusuppara Ukrainep niueqatigineqarsinnaanera ukkatarineqassasoq, Mykhailo Vydoink oqarpoq.
Umiarsualiviit matuneqarlik
Ukranemi præsidenti Volodymyr Zelenskyj folketingimi ilaasortanut oqalugiarmat Ukrainep ambassadøria folketingimeeqataavoq. Mykhailo Vydoinkip oqaatigaa, Europap Ruslandimik niueqateqarnerminik aamma uuliamik gassimillu pisiaqartarnerminik unitsitsinissaa pingaaruteqartoq, Ruslandip anigaasat isertitani sorsunnerup aningaasalersorneqarneranut atuinera pissutigalugu.
Annernarsinnaasoq ataaseq aamma tassaavoq umiarsualivinnik matusineq, EU taamalu aamma Savalimmiut umiarsualivinnik suli matusinngillat, ambassadørilli pilertortumik matusisoqarnissaa sakkortuumik kaammattuutigaa.
- Ruslanip iliuuserisaanut tamanna pillaatitsialaassaaq, Mykhailo Vydoink oqarpoq.
Illuatungiliuttut mattussinissamut tapersiisut
Illuatungiliuttutut partiit pingasuut Tjóðveldi, Javnaðarflokkurin aamma Sjálvstýri, suliat ilaanni naalakkersuisooqatigiinnut suleqataasarsimasut, Ruslandimik niueqateqarnerup unitsinneqarnissaanut piareqqapput.
Russit umiarsuaat Savalimmiuni umiarsulivinnut suli talissinnaapput, tamannali Ruslandimullu tunisaqartarneq unitsinneqassapput.
- Siulivut sorsunnersuup aappani Tuluit Nunaannut aalisakkanik imaatigut assartuisarsimasut tamatta tulluussimaarutigisarpavut. Tysklandimut assartuisarsimappata tulluussimaarutigisimanavianngilagut. Taava immitsinnut aperisariaqarpugut, Ruslandip nunamut oqartussaaqataanermik tunngaveqartumut inunnullu pisuussuteqanngitsunut qaartartumeerisanerani aalisagaativut Ruslandimut tunisarutsigit kingulitta tulluussimaarutigissaneraatigut, Javnaðarflokkurin-imi siulittaasoq Aksel V. Johannesen Kringvarp Føroya-mut oqarpoq.