Ukrainemiu Nuummi najugaqartoq sorsunnermi toqutaavoq

Ivan Dumanov, Nuummi najugaqartoq, Ukrainemi russinut sorsoqataanermini pingasunngornermi 4. maj toqutaasimavoq. Ajunaarnera angajoqqaavinut sakkutooqataasa kalerriutigisimavaat. Ivan Dumanov 30-nik ukioqarpoq.

Ajunaartoqarnera Kommuneqarfik Sermersuup tusagassiorfinnut nalunaarutigalugu taama allappoq.

Ivan Dumanov russit Krimip qeqrtaasaanik tiguaammata Danmarkimut qimaavoq. Qimaasutut Damnarkimi najugaqarsinnaalerami Kalaallit Nunaannut nuukkumavoq. Taamaasilluni qimaasutut taaneqarsinnaalluni nunatsinnut siullersaalluni maannamullu kisiartaalluni nunasilluni.

Ivan Dumanov aningaasaqarnermut tunngasunik suliaqartutut ilinniagaqarpoq, tikinnerminilu Kommuneqarfik Sermersuup aningaasaqarnermut immikkoortortaqarfiani atorfinilluni.

- Ivan suleqatigisimasanni ilakkuminarnerpaanut akuuvoq. Ilinniarluarsimasuullunilu poqersuuvoq. Sukkasuumik danskisut ilikkapallappoq, aamma kalaallisut ilikkagaqapallalluni, pisortaa Dorthea Olsen Rasmussen oqarpoq.

Nuna inunngorfini illersorumagaa

Ruslandip Ukraine 24. februar saassullugu isaaffigaa. Tamassuma kingorna sorsunneq sakkortusigaluttuinnarsimavoq.

Ivan Dumanov ilaquttani ikioriartorlugit nunalu inunngorfini illersoriartorlugu martsip aallartinnerani Ukrainemut aallassalluni aalajangerpoq.

Sulisitsisuminut akissarsiaqarani sulinngiffeqarnissamut qinnuteqarsimasoq, Kommuneqarfik Sermersooq ilisimatitsivoq.

- Kalaallit Nunaat pinngortitarsuarlu nuannarilluinnarpaa. Umiatsiaaraateqarami angalaallattaajuartarpoq. Aamma katersuulluni naapeqatigiittarnerit nuannarai. Peqannginnerani oqaloqatigigaangakku Kalaallit Nunaanukaqqinnissani qilanaaralugu oqaatigiuartarpaa, Dorthea Olsen Rasmussen oqaluttuarpoq.

Ivan Dumanov Ukrainemi qaammatini marlungajanni akersuuteqataavoq, pingasunngornermi majip sisamaani ajunaarnissami tungaanut. Nunatsinni aappaqarpoq.

Suleqatigisimasap sorsunnermi ajunaarnera pillugu Kommuneqarfik Sermersuup erfalasuni ullumi qiteqqusimatippai.