Ukkusissani innuttaasut: Angallat ajoqusertoqartinnagu qaqinneqarli
Aasianni innuttaasut kisimik angallammik umiarsualiviup eqqaani kiveqqasumik naammagittaalliuuteqanngillat. Ukkusissani innuttaasut aamma angallat sissap qanittuani ikkarleqqasoq ajornartorsiutigisarpaat.
Nunaqarfinni Ukkusissani, Saattuni Ikerasammilu nunaqarfinni aqutsisunut ilaasortap Paninnguaq Petersen Skadep (S) angallat Ukkusissat avatinnguanni qanga ikkarlissimanersoq eqqaamanngilaa.
- Ukiualuit matuma siornatigut ikkarlippoq. Ikkarleqqasoq umiatsiaaqqat nunamut tulanniaraangata akorngutaasarpoq, Paninnguaq Petersen Skade oqaluttuarpoq.
Angallat alla Aasiaat umiarsualiviata eqqaani ukiut qulit sinnerlugit kiveqqasoq, najukkami politikkerit innuttaasullu uteriisernerisigut sapaatip akunnerata ataatsip matuma siornatigut qaqinneqarpoq.
Umiatsiaaqqat ajoquserneqarsinnaasut
Nunaqarfinni aqutsisut kissaatigaat nunaqarfinni angallatit aamma qaqinneqartarnissaat. Ukkusissammi eqqaanni angallat ikkarleqqasoq umiatsiaaraatilinnit naammagittaalliuutigineqartaqaaq.
- Umiatsiaaqqat nunamut qaqinniarneqartillutik ajoqusersinnaapput. Angallammi umiatsiaaqqat nunamut qaqittarfiata aqqutaani ikkarleqqavoq. Ilungersunarluinnartumik ajoqusertoqartinnagu angallatip qaqinneqarnissaa kissaatigaarput, Paninnguaq Petersen Skade oqarpoq.
- Ukiakkullu anorersuartaleraangat suli ulorianarninngortarpoq. Taamaatsillugumi umiatsiaaqqat nunamut qaqinniarneqartarnerat ilungersunartarami, taanna oqaluttuarpoq.
Atortut pingaarutillit
Naatsorsueqqissaartarfik naapertorlugu Ukkusissat ukioq manna juulip aallaqqaataani 149-nik inoqarpoq. Pingaarnertut inuussutissarsiutigineqarpoq aalisarneq, aammali piniariartarneq ulluinnarni inuuniutinut ilaavoq. Taakkununnga atatillugu umiatsiaaqqat atortuupput pingaaruteqarluinnartut . Umiatsiaaqqammi taakkulu motoorii ajoquserneqassagaluarpata taartissaannik pissarsiniarnissaq imaaliallaannagassaasanngilaq.
- Angallatip iliuuseqarfigineqarnissaanik kommunimit neriorsorneqarsimavugut. Nammineerluta angallat qaqissinnaanngilarput, taamaammat ikiorteqarnissaq qaqitsiniarnermilu atortoqarnissaq pisariaqarpoq. Kommunimilli piffissami kingullermi nalunaarfigineqarpugut, qaqitsinissamut aningaasanik immikkoortitsisoqarsimanngitsoq, Paninngaq Petersen Skade oqarpoq.
Sermitsiaq.AG-p angallatip qaqinneqarnissaanut atatillugu Avannaata Kommunia oqaaseqartinniarneqarpoq.
Ukkusissani nunaqarfimmi aqutsisut ilisimatitsissutigaa, kommunip iliuuseqarnissaa maanna utaqqimaarneqartoq.
Avannaata Kommunianit ilisimatitsissutigineqarpoq, angallammik Ukkusissat eqqaaniittumik kina qaqitsinissamut akisussaasuunersoq pillugu kommuni Namminersorlutillu Oqartussat oqaloqatigiittut.