Ukkusissamut aqqut nalunaaqutsersorneqartoq
Ukkusissap qaavanut aqqutip nalunaaqutsersorneqarnera Colourful Nuup aallartippaa. Nalunaaqutsersuinermi pisuttut isumannaannerusumik ingerlasarnissaat siunertaavoq. Nalunaaqutsersorluarneqarsimannginnerup kinguneranik qaqqarsuarmi majuartut ilaat aqqutikkut kukkusukkut ingerlasarsimapput, ilaatigullu toqusoqartarluni.
Nuummi illoqarfiup ilaani Qinngorput-mi qaqqarsuaq 722 miiterisut portutigisup nuuanut aqqut maanna nalunaaqutsersorneqarluni suliarineqalerpoq. Qaqqarsuarmut majuartut isumannaannerunissaat anguniarneqarpoq.
Colourful Nuuk nalunaarsuinissamik suliniuteqarluni aallartissimavoq, pisuttut isumannaannerusumik aqquteqarnissaat anguniarlugu.
- Ukkusissami annaassiniartarnerit amerlavallaarujussuarput, ilaallu toqumik allaat kinguneqartarlutik. Taamaammat Colourful Nuuk oqartussat susassaqartut peqatigalugit Ukkusissap majuariaatigut nalunaarsuivoq, stolpenik ikkussuititsilluni, Colourful Nuummi suliniummi aqutsisoq Salik Hard oqarpoq.
Sisamanngornermi aallartittut
Nalunaaqutsersuineq sisamanngornermi aallartippoq, EMJ Atcon qaarsumi putoorissaaq stolpenillu ikkussuissalluni. Nuummi Politiit, qatserisartut, Asimiu, Nuuk Adventorous aamma Colourful Nuuk peqatigiillutik aalajangiissapput stolpet qulit sumerpiaq inississanersut.
- Ullup ingerlanerani nalilersussavarput stolpet qassit ikkutereersinnaanerlugit. Ukkusissaq maanna aputeqalereerpoq, aqqutaalu ajornaatsuinnaanani. Ullormi ataatsimi naammassinissarput ilimagineqarsinnaanngilaq, Salik Hard Sermitsiaq.AG-mut oqarpoq.
Salik Hard ilisimatitsivoq nuna aputeqarlualereerpat stolpet sinneruttut ikkussorneqassasut, naatsorsuutigineqarsinnaasorli ukioq naatinnagu stolpet tamakkerlutik ikkussorsimanissaat.
Colourful Nuup naatsorsuutigaa suliniut 20.000 koruuninik akeqassasoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...