Ukiuunerani nalunnguarumatuut kissaatertik piviusunngortippaat
Ukiuunerani nalunnguarumatuut Nuummi nunaminertamik tunineqarput, tassani saunartarfimmik aamma illuaqqanik atisanik taarsiisarfinnik marlunnik sanasoqarsinnaalluni.
Saunartarfimmut isersinnaagaanni Nuup Kangerluani nalunnguarneq erniinnartumik soqutiginarsissaaq. Nuummi nalunnguarumatuut ukiorpassuarni tamanna kissaatigisimavaat, maannalu takorluukkap piviusunngortinnissaanut qaninnerulerluni alloriartoqarpoq.
Nalunnguarumatuut qeqertap Qasigiannguit eqqaanni nunaminertassarsiniarlutik qinnuteqarput, qinnuteqaallu Sanarfinermut Avatangiisinullu Ingerlatsiviup piumasaqaatitalimmik akueraa.
Ingerlatsivimmit nalilerneqarpoq sauna- aamma atisanik taarsiisarfimmik sanaartorsinnaanermik periarfissaqarneq Qasigiannguit eqqaanni inuummarissaataassasoq sumiiffiullu sukisaarsartarfittut atorneqarnissaa pitsaasuussasoq, misigisassanullu nutaanut ilapittuutaajumaartoq. Saunamik atisanillu taarsiisarfimmik sanaartorneq aamma illoqarfimmi ukiuunerani nalunnguarumatuunut periarfissiillualissaaq aammalu piumasut misileraasinnaalissapput.
Immikkut piumasaqaatit
Immikkut ittumik piumasaqaatit tulliuttut tunngavigalugit nunaminertamik atugassiisoqarpoq:
- Silataasa sanaartorneri qisummik qaliaalu qalissiarsuarmik qalliuserneqassapput.
- Saunamik atisanillu taarsiisarfimmik atuinerit illuutit eqqaaniittut biilinut unittarfiutaannut artukkiissanngilaq.
- Sumiiffik tamanit tikinneqarsinnaassaaq aammalu assersorneqassanani.
- Eqqakkat Kommunip Eqqakkanik tigooraavia isumaqatigalugu pissapput sumiiffimmilu uninngateqqusaanngillat.
- Nunaminertamik atugassiineq qaammatinik marlunnik sivisussusilimmik ilisimatitseqqaarluni unitsinneqarsinnaavoq.
Sanaartugassaapput saunaliassaq atisanillu taarsiisarfiit marluk. Sanaartugassat pingasuusut nunamut kappussanik toqqaveqartinneqassapput qasertoq taartumik qisuusumik qalliuteqartussaallutik, takuuk titartagaq nunallu assinga ilanngussat.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...