Ukiuunerani ingerlatsinermut annertuumik kinguneqassasoq: World of Greenlandip illuaraataa nungulluni ikuallassimavoq
Aningaasaliiffigisimasaq pingaarutilik, ukiorpassuarni ineriartortinneqarsimasoq nungulluni ikuallassimavoq. Wold of Greenlandimi pisortaanerup nassuiaatigaa, ikuallanneq ukiuunerani ingerlatsinermut annertuumik kinguneqassasoq. Politiit suliamik misissuipput.
Arfininngornermi unnukkut Ilulissani nunap timaani pujortoqartoq
kalerriisoqarpoq.
Pujoq illoqarfimmiit 12 kilometerinik ungasissusilimmiittumi illuaqqameersuusoq paasineqarsimavoq.
Illuaraq takornariaqarnermik sullissinermut World of Greenlandip ingerlataanut
”Igloo Lodge”-nut ilaasoq ukiuunerani unnuiffittut atorneqartarpoq.
- Illuaqqap nunguilluni ikuallannera ajuusaarnaqaaq. Qujanartumillu
ikuallannerata nalaani sulisunik, takornarianik allanilluunnit tikeraanik
najorneqanngilaq.
World of Greenlandip pisortaanera Asger Køppen tusagassiorfitsigut nalunaaruteqarnermi taamatut oqarpoq.
Annertuumik kinguneqassasoq
Ikuallanneq ajoraluartumik ukiuunerani ingerlatsinitsinnut annertuumik kinguneqassaaq, qularnanngitsumillu suleqatigisat allat aamma eqqorneqassapput, pisortaaneq nassuiaavoq.
- Illuaraq taanna Igloo Lodge-nik taasanut, tassa illuaqqanut nerinertalimmik unnuiffiusartunut, ukiullu arlallallit ingerlanerini ineriartortitatsinnut ilaavoq. Neqeroorut taanna, ukioq kaajallallugu takornariaqartitsinermik suliassaqartitsinermut aningaasaliissutaavoq iluatsilluartoq, pisortaaneq oqarpoq.
Illuaqqap nunguilluni ikuallannera nunaqavissunut suliassaqartitsinermut ingerlatatigullu kaaviiaartitsinermut annertuumik sunniuteqassaaq. Ukiormi kingulleq ukiuunerani tikeraat 600-t sinneqartut tassani unnuipput.
Politiit suliamik misissuisut
Ukiuunerani tikissallugu nuannarineqarluartumik World of Greenland kisimi annaasaqartuunngilaq.
Asger Køppenip nassuiaatigaa, nunaqavissut suleqatigilluakkat amerlasuut, tassa qimussiussisartut, snescooterinik angallassisartut, immakkullu angallassisartut aamma suliassaqartitsinikkut eqqugaassasut.
- Maannakkorpiaq pisoq taanna ajuusaarnaqisoq uppernarpianngitsorlu
eqqarsaatigeqqaassavarput, ikuallaffiusullu oqartussanit attuumassutilinniit ileqquusumik paasiniaaffigineqarnerata inernera utaqqissallugu. Ukiuuneranilu unnuisarfissamik neqeroorsinnaajumalluta illuaqqamik nappaaqqinnissamut periarfissat piaartumik eqqartussavavut, taanna oqarpoq.
Kalaallit Nunaanni Politiit pigaartuinit Sermitsiaq.AG-mut ilisimatitsissutigineqarpoq, illuaqqap ikuallassimaneranut suna pissutaanersoq politiit misissuiffigeruttuleraat. Politilli ikuallatsitsisoqarsimaneranik maannakkorpiaq pasitsaassaqanngitsut ilisimatitsissutigalugu.