Ukiut sisamaata affaani akissarsiani utaqqisariaqarai
Kommunimi aningaasaqarnermut pisortaq aallareerluni atorfimminit suliunnaarsitaavoq. Kommuni eqqartuussivimmi suliami ajorsarpoq. Aningaasaatinilu tamaasa tigutinnagit sivisoorsuarmik utaqqivoq akiliisitsiniartarfillu aqqusaaqattaareerlugu.
Qaasuitsup Kommuniani (Maanna Avannaata Kommuniani, aaqq.) aningaasaqarnermut pisortaasimasoq Claus Bergman 2015-imi naapertuutinngitsumik atorfimminit suliunnaarsinneqarpoq.
Kingorna akissarsiassani tamakkiisut akilertinniarlugit sivisoorsuarmik ilungersorpoq. Aatsaat ullut arlalialuit matuma siornagut kommunimik saqitsaassuteqarneq nungullarsaataasoq naggaserneqarpoq, eqqartuussisssuserisuanut aningaasat kingullit kontoanut akilerneqarmata.
AG taama allaaserisaqarpoq.
Tallimanngormat Ilulissani Qaasuitsup Eqqartuussiviani naggataarutaasumik eqqartuussinermi akiliisitsiniartartup allattaaviani allassimasut AG-mit pigineqarput. Tassani allassimavoq aningaasat akilerneqanngitsut katillutik 179.164 koruuniusut, eqqartuussinerullu ingerlanerani eqqartuussisup Mette Munch Grønbækip kommunimit aallartitaq qinnuigaa »erngerlutik« aningaasat akileqqullugit.
Kingorna inimit eqqartuussivimmit toqqaannartumik kommunimit aallartitaq kommunip aningaaserisoqarfianut sianerpoq aningaasat nooqqullugit. Mamianartumillu misilittakkat peqqutigalugit tamanna Claus Bergmannip eqqartuussissuserisuata naammaginngilaa. Piumasaraa taarsiullugu kommunip kontoanit akilerneqartoq Grønlandsbankenimeersuussasoq.
Claus Bergmannip eqqartuussissuserisua Henrik Karl Nielsen suliap ingerlasimaneranut tamarmut sullitamisuulli tupigusutsigaaq.
- Sullerlunnerup saniatigut kommunip periusaanut allamik nassuiaatissaqanngilanga, oqarpoq.
Eqqunngitsumik soraarsitsinerup tunuliaqutaa atuarsinnaavat, kiisalu Claus Bergmannip suliaq pillugu qisuariaataa. Uani ataani linki aqqutigalugu aviisimut isissutissarsisinnaavutit: