Ukiut 40-t kingorna: Ilinniut kalaallisoortoq
Tusagassiornermik ilinniarfik kalaallisuumik ilinniutitaarnissaanut ukiut 40-ngajaat ingerlaqqaarsimapput.
Atuagaq ilinniut qulequtaqartoq “Tusagassiornerup tunngavii” maanna saqqummerpoq, taanna qallunaatuumit ”Journalistikkens grundtrin”-imit nutsigaavoq, Danmarks Medie- og Journalistskolemi ilinniartitsisunit Solvej Schmidtimit Mette Mørkimillu allagaalluni.
- Nunatsinni tusagassiortunut ilinniarfeqalerneranit ukiut 40-ngajaat qaangiutillartullu tusagassiornerup tunngavij pillugit ilinniummik kalaallisut allassimasumik kiisami peqalernera tulluusimaarnarlunilu pisuunnguallaataavoq. Tusagassiortunngorniarlutik ilinniartut - allarpassuillumi - kiisami namminneq oqaatsitik atorlugit tusagassiornerup pissusianut sakkuinillu tunngasunik atuagassaqalerput, asulu nunatsinneersunik assersuutissartaqarluni, Ilisimatusarfimmi Tusagassiornermut Immikkoortortami pisortaq, Naja Paulsen oqarpoq.
Nunatsinnut tunngasoq
Qallunaatuumit nutsigaannaananili assersuutinik nunatsinneersunik imaqarpoq, kapitaleqarporlu ‘’nunatsinni tusagassiuutinut’’ tunngasumik. Taamaalilluni nunatsinni tusagassiortunngornianut, tusagassiortunut tusagassiornermillu soqutigisaqartunut allanut ilisarnartunik arlalinnik imaqarpoq, tusagassiuutinut nalunaarummi tamanna ilisimatitsissutigineqarpoq.
Atuagaq 252-inik qupperneqarpoq 250 koruuninillu akeqarpoq, taanna Ilisimatusarfiup nittartagaa aqqutigalugu webshop.uni.gl-imi pisiarineqarsinnaavoq.
Mariia Simonsen nutserisuullunilu aaqqissuisuuvoq.