Ukiut 15-it qaangiuttut pisortaq tunuarpoq
Karsten Høy Nalik Venturesimi pisortatut taamaatippoq. Peter Christiansen pisortaagallartussatut atorfinitsinneqarpoq.
Namminersorlutik Oqartussat inuussutissarsiornikkut siuarsaasarnermut ingerlatseqatigiiffiani Nalik Ventures A/S-imi pisortaaneq, Karsten Høy, ukiut 15-ini atorfeqareerluni tunuarpoq.
Siulersuisut maanna aningaasaqarnermut pisortaasoq, Peter Christiansen, pisortaanerugallartussatut atorfinitsinniarlugu aalajangerput. Siulersuisut pilersaarutigaat siunissami qaninnerpaami pisortamik nutaamik atorfinitsitsisoqassasoq, ingerlatseqatigiiffik tusagassiuutinut nalunaarummi ilisimatitsivoq.
Karsten Høyip suleqatinilu Nalik Ventures A/S-imi ineriartortitsineq pilersissimasartik tulluusimaarutigalugu oqaaseqarpoq, taanna ingerlatseqatigiiffiit pingasuusimasut Greenland Holding, Greenland Venture aamma Innovation Greenland kattunneqarnerannik pilersitaavoq.
Allanik suliaqarnissamut piffissanngortoq
- Maanna uannut suliassanik nutaanik aallussinissamut piffissanngorpoq, tamannalu qilanaaraara. Ukiut misigisallu arlalinngortut nuannersut ingerlatsivimmi tassani suliffigisimavakka, ingerlatsivik suleqatigiillu pikkorissut tamaasa sulineranni tamanik ajunnginnerpaanik kissaappakka, Karsten Høy oqarpoq.
Karsten Høyip ukiuni 15-ini kiffartuussisimaneranut Nalik Venturesimi siulersuisuni siulittaasup Miki Lyngep qujaffigaa.
- Karstenip Nalik Ventures A/S ingerlatsiviit arlallit akornanni qitiusumik inissisimaffeqalertussatut ineriartortinneqarnera peqataaffigisimavaa, suliffeqarfiillu pissanganartut pilersitseqataaffigisimavai, Kalaallillu Nunaanni suliffeqarfiit inuussutissarsiutillu nutaat aallarnisarneqarnerannut aallarnisaasuusarsimavoq, Miki Lynge oqarpoq, nangillunilu:
- Karsten ilaatigut pissutaalluni Kalaallit Nunatsinni suliffeqarfiit ataatsimoorfiat ullutsinnut naleqquttoq, ineriartortitsinermut qitiusoqarfiusoq pilersinneqarsimavoq. Ingerlatsivik siunissamut inuiaat akornanni takorluukkat piviusunngortillugit appakaannissaminut piareersimasoq. Siulersuisut minitaqarata oqarsinnaavugut Karstenip ukiorpaalunngortuni suliarisimasai pillugit qujamasukkatta
Pisortap tunuarnera nammineq kissaateqarneranik pisoq aamma eqqissisimasumik pisimasoq, siulersuisuni siulittaasup Sermitsiaq.AG-mut oqaatigaa.