Ukiup affaanut nalunaarusiaq: Neqi ukiuni arlaqartuni amigartooruteqartarsimasoq

KNI-mi kanngunartuliorsimaneq 2020-mili novembarip qaammataani eqqissisimatitsisimanngilaq, taamanikkut KNI-mi uninngasuutit nalingannik annertunaaraluni naatsorsuisimaneq siullermeersumik tamanut saqqummiunneqarpoq. Kanngunartuliaasimasoq aamma ukiup affaanut nalunaarusiamut sunniuteqarsimavoq, tassani ilaatigut allassimavoq, ingerlatseqatigiiffiup aningaasaqarneranik saliineq suli ingerlanneqartoq.

Ingerlatseqatigiiffimmit oqaluttuarineqarpoq, ukiumi naatsorsuusiorfiusumi matumani saliinerup naammassineqarsimanissaa neriuutigineqartoq, ukiup naatsorsuusiorfiusup tulliani aallaqqaataaniit aallartittoqarniassammat.

KNI-mi 2021-nu apriilip aallaqqaataaniit septembarip 30-ata tungaanut eqqissisimasoqarsimanngikkaluartoq, akilraarutit suli peernagit ukiumi angusarineqarsimapput 2,5 millioner koruunit.

KNI Namminersorlutik Oqartussat niuernermi kiffartuussinermilu suliffeqarfiutigaat, ilaatigut illoqarfinni nunaqarfinnilu ulluinnarni atugassanik tunisaqartartoq kiisalu ikummatissanik tunisaqartartoq, aamma ukiup affaani 1,2 milliarder koruunit kaaviiaartinneqarsimapput.

Annaasat 20,8 millioner koruuniusut ilanngullugit naatsorsorneqarsimasut

Polaroilip sinneqartooruteqarneranit kiisalu nioqquteqarnermik ingerlatsiviup aamma Neqi A/S-ip amigartooruteqarnerinit angusat katitigaasut, ingerlatseqatigiiffimmit tusagassiorfinnut nalunaaruteqarnermi oqaluttuarineqarpoq.

KNI-mit erseqqissaassutigineqarpoq, ukiumut naatsorsuutit 2020/21-moortut naammassinegamata quimi uninngasuutinut nalikilliliinermullu tunngasut 20,8 millioner koruuninik allannguuteqaratarsinnaanerat ilineqarsimasut.

Naatsorsuutini tukattaoqarnera KNI-p immikkoortortaqarfianut toqoraavimmut Neqimut sakkortuumik eqquisimavoq.

KNI allappoq, Neqi ukiuni arlaqartuni amigartooruteqarfiusumik ingerlanneqarsimasoq takuneqarsinnaasoq:

Neqi aningaasatigut taperserneqassasoq

- Akuerineqanngitsunik nuussisarsimanerit iluarsineqareernerinit maannakkut paasinarsivoq Neqi A/S ukiuni arlalinni amigartoorfiulluni ingerlanneqarsimasoq.

- KNI-mi aalajangerpugut Neqi A/S-ip aningaasaqarnerata siunissami inaarutaasumik paasineqarnissaata tungaanut suliffeqarfittut pingaarnertut aningaasatigut tapersersorniarlutigu. Ajornartorsiutip qanoq suliarineqarnissaa pillugu maanna KNI Namminersorlutik Oqartussanik oqaloqateqarpoq, ukiullu naatsorsuiffiusup matuma naannginnerani aaqqiissuteqartoqarnissaa naatsorsuutigineqarpoq, ingerlatseqatigiiffik allappoq.

KNI-mit siusinnerusukkut oqaluttuarineqarsimavoq, Neqi nammineq aningaasaatimigut 29 millioner koruuninik amigartooruteqarsimasoq, kingullermillu naatsorsuusiortoqarnerani nammineq aningaasaatimigut 56 millioner koruuninik amigartooruteqarsimalluni. Aningaasat suliffeqarfiup nammineerluni matussusersinnaanngilai, taamaammat Naalakkersuisut isumaqatigiissuteqarfigineqassapput.

Siulersuisuni siulittaasoq naammagisimaarinnittoq

Ingerlatseqatigiiffiup siulersuisuini siulittaasunngorlaap Svend Hardenbergip saliinerup ingerlalluarnera naammagisimaarpaa. Mianersoqqutigaali nunaqarfinnit nutsertoqarnera pissutigalugu piffissaq ungasinnerusoq eqqarsaatigalugu aningaasaqarnikkut ajornartorsiortoqalersinnaanera:

- KNI-p aningaasaqarnerata killiffia ukiup affaanoortumik nalunaarutip ersarissumik takutikkaa siulersuisut naammagisimaarinnillutik paasivaat.

- Paasinarsivorli aamma suliffeqarfiup aningaasaqarnera siunissami aamma ajornartorsiorfiussasoq, ilaatigut KNI-p naatsorsutaasa torersaavigineqarneranni suliffeqarfiup aningaasaqarnerata allarluinnaanera pissutigalugu aammali nunaqarfinniit illoqarfinniillu mikinerniit illoqarfinnut anginernut nutsertoqarnera pissutigalugu, tamannalu ingerlatseqatigiiffiup nioqquteqarnermik ingerlatsiviani assut ajornartorsiutaavoq. Taamaattumik ingerlatseqatigiiffimmut siunissami atugassarititaasut qanoq
qulakkeerinniffigisinnaanerivut piffissami aggersumi piginnittutsinnut
oqaloqatigiissutiginiarparput, Svend Hardenberg tusagassiorfinnut nalunaaruteqarnermi oqarpoq.

KNI-mit ukiup affaanut nalunaarusiami ukiumi tamarmiusumi akileraarutit suli peernagit 119 millioner koruuninik angusaqarnissamik naatsorsuutigineqartut, akileraarutit suli peernagit 85 millioner koruuninut annikillisissimavai.

KNI-mi tukattumik naatsorsuusiortarsimaneq pillugu paasisaqarnerugit, uani.