Ukiup affaanut naatsorsuutit: Royal Greenland coronamit sunnerneqarsimasoq
2020-p ukiuata qiteqqunnerani ingerlatsinermi angusat takutippaat 16 millioner koruuninik amigartooruteqartoq 2019-imi ingerlatsinermi sinneqartoorutinut 87 millioner koruuniusunut sanilliullugu. Annikinnerusumik isertitaqarneq tunngaveqarpoq Covid-19-ip niuffaffinnik sunniineranik aammalu kinguppannut uutanut qalipaajakkanullu niuffaffiup tatineqarneranik.
Royal Greenlandip kaaviiaartitai siornamut sanilliugullugu, ukiup affaani siullermi ni procentimik appariarsimapput. Suliffeqarfik ukiup affaanut nalunaarusiaminut atatillugu taamatut ilisimatitsissuteqarpoq.
Royal Greenland suliffeqarfippassuit allat assigalugit coronamit tatineqarsimavoq. Ukiup qaammataani siullerni sisamani ajornerpaasimavoq, nunarsuarmi inuiaqatigiit ingerlatsinerisa annersaat matoqqasimammata.
Tamanna Royal Greenlandip nerisassanik sassaallertarfinnut nerisassanillu suliaqarfinnut allanut suliareqqitassanngorlugit tunisaqartarneranut annertuumik sunniuteqarsimavoq.
Pitsaanerusumik ingerlasoqalersoq
Tunisaqartarnerli naligninnaasunngoqqilerpoq. Niuffaffimmik ammaassiartuaarnerup siorna tunisinerup annertussusaa qanilliartortippaa, Royal Greenland ilisimatitsivoq.
Pingaartuuvoq Asiami ingammillu Kinami niuffaffik, Royal Greenlandip annerpaamik tunitsivia ukiup affaata kingulliup ingerlanerani pisarnermisut ilissasoq, tassanilu pingaartuuvoq erseqqissassallugu tunisassiat Kalaallit Nunaanninngaanneermata taamalu Covid-19-qarfiunngitsumeerlutik.
Taamaalilluni internetsikkut niuernermi suliniuteqarneq niuffaffinnilu assigiinngitsuni suliniuteqarneq annertunerupallalersimavoq, pingaartumik Kinami aamma Japanimi. Kinamiittumik Beiyang Jiamei Seafood-imik suleqatigiinnissamik 2019-ip naalernerani isumaqatigiissutip naleqarnini takutereerpaa, suliffeqarfik ilisimatitsivoq.
Kinguppaat amerlavallaartut
Covid-19-ip annertunerpaaffiani kinguppannut uutanut qalipaajakkanullu niuffaffik tatineqarpoq, pingaartumik kinguppaat angisuut eqqarsaatigalugit. Niuffaffik 2019-ip qiteqqunnerata kingorna amerlavallaartunik nioqqutissaqalersimavoq akigititaasut malunnarluartumik apparnerinik kinguneqartumik.
Qaammatini siullerni arfinilinni Royal Greenlandip ilanngaatissat ilanngaatigereerlugit angusai 39 millioner koruuniupput, siorna piffissami tassani 141 millioner koruuniusimallutik.
- Royal Greenlandip sumiiffinni inuiaqatigiinnut sunniutaasut ataqqillugit aalisarnerup tunisassiornerullu ingerlatiinnarneqarnissaat sallinngortippai, suleqataasullu atugarititaasuni ajornakusoortuni pitsassuarmik naammassisaqarsimapput. Neriuutigaarput niuffaffimmi pissutsit sallinngortitsinitta tamatuma attatiinnarnissaanut periarfississagaatigut, suliffeqarfimmit oqaatigineqarpoq.
Akiitsut erniallit 276 millioner koruuninik qaffariarsimapput siorna taamalineranut naleqqiullugit, tassunga peqqutaavoq kilisaatinik nutaanik marlunnik, tassa Avatamik aamma Nataarnamik sanatitsineq, Nataarnaq 2021-imi aasakkut tunniunneqassaaq, Avatarlu decembari 2019-mi tunniunneqarluni.
Ingerlatseqatigiiffiup atortorissaarutit immikkut ittut 750 millioner koruuninik nalillit pilersissimavai, Covid-19-ip pilersissinnaasaanik nalorninartut pakkersimaarniarlugit, taakkuli attorneqarsimanngillat. Aningaasaatit tigoriaannaat massakkorpiaq 1,4 milliarder koruuniupput.
Nammineq aningaasaatit 1,7 milliarder koruuniupput, akiliisinnaassuseq 31,4 %-iulluni.
2019-imi ukiup qiteqqunnerani sinneqartoorutit 141 millioner koruuniupput kilisaatit Sisimiut aamma Qaqqatsiap tunineqarnerini, ukiorli manna ikerinnaasiortunik aalisariutip tuninerani amigartoorutit 15 millioner koruuniullutik. Tunisinerit taakku ilanngullugit akileraarutit akilersinnagit angusat 228 millioner koruuniniit 31 millioner koruuninut appariarsimapput.
Ukiup affaanut nalunaarusiaq atuaruk UANI