Savalimmiut
Ukiunut tallimanut sanaartornermik suliniutinut 11 milliarder koruunit
Savalimmiuni aatsaat taama amerlatigisunik aningaasaliissuteqartoqarpoq. Ukiuni tulliuttuni tallimani 11 milliarder koruuninut sanaartortoqassaaq. Tamanna takuneqarsinnaavoq aviisip Sosialurin-ip takussutissiaani
Savalimmiuni aningaasarsiorneq ingerlalluarpoq, tamannalu sanaartornermi malutigineqarsinnaavoq. Ukiunut tulliuttunut talimanut sanaartornermut aningaasaliissuteqartoqarpoq, siusinnerusukkut Savalimmiuni piffissamut taama sivikitsigisumut takuneqarsimanngitsumik.
Landskarsi, kommunit namminersortullu ukiuni tulliuttuni tallimani 11 milliarder koruuninut sanaartorniarput. Tamanna takuneqarsinnaavoq aviisip Sosialurin-ip takussutissiaani.
Ilaatigut immap naqqata ataatigut sulluliarsuarnut marlunnut aningaasaliisoqassaaq, naatsorsuutigineqarporlu taakkua 2,2 milliarder koruuninik akeqassasut. Savalimmiuni aqqusinniornermut pisortaqarfik, Landsverik, 1,7 milliarder koruuninut sanaartussaaq, namminersortorlul Bakkafrost kapisilinnik tukertitsiviliussaaq 650 millioner koruunilimmik.
Aqutsilluarnissaq pisariaqarpoq
– Sanaartugassat ima annertutigaat aqutsilluartoqartariaqarluni, økonom Eydfinn Reydberg Sosialurinimut oqarpoq.
Aningaasartuutissat ilarpassui aningaasanut inatsimmi takuneqarsinnaanngillat. Assersuutigalugu Savalimmiuni sanaartornermik suliniutit annersaannut, immap naqqata ataatigut sulluliassanut marlunnut, taakkulu anpartsselskabimit pisortanit pigineqartumit sananeqassapput. Aammalu pisortat inissialiassaat arlallit.
– Sullulianut marlunnut anpartsselskabi pisortatnit pigineqartoq aningaasaliisussaagaluartoq inuit akileraartartut taakkorpiaat taarsigassarsiaat atuisartunut akiliutitigut akilissavaat, Eydfinn Reydberg oqarpoq.
Nalinginnaasumik pitsaanerusaraluarpoq aningaasaliissutissat annersaat namminersortuneersuugaangata, taanna nangilluni oqarpoq.
Aningaasanut inatsit suli amigartooruteqassaaq
Ukiuni aggersuni aningaasaliissutissarujussuit saniatigut pisortat sanaartugassarsuarnut aningaasaliissuteqareerput, tamatumani ilanngullugu ilinniagaqarfimmut milliardip affaanik akilimmut.
Savalimmiut ingerlalluaraluartoq aalisakkallu avammut tunisartakkat amerleriangaatsiarsimagaluartut aningaasanut inatsisikkut sinneqartooruteqarnissaq suli anguneqarsimanngilaq.
Ukiumoortumilli amigartoorutit millioninik untritilinnik arlalinnik ikilisinneqarsimapput, siornalu amigartoorutit 156 koruuniusimallutik.
Aningaasaqarnermut ministeri Kristina Háfoss, Tjóveldi, ilimasaarisimavoq 2016-imi sinneqartooruteqartoqassasoq.
Aningaasanut inatsisikkut amigartooruteqartarneq pissutigalugu akiligassat ikilisarneqarsinnaasimanngillat, maannalu taakkua 6 milliarder koruunit sinnerlugit amerlassuseqalersimapput.