Ukiuni qulini Namminersorlutik Oqartussat: Tusagassiiviit kiffaanngissusillit piginagit tappingersitaassaagut
Ukiut qulit matuma siorna tusagassiiviit maannamit taakkuinnaanerupput allanngujaannerullutik. Ullumikkut paatsiveqannginnerupput. Tusagassiiviit nutaat saqqummersarput, allallu atorunnaartarlutik. - Tusagassiornermik "nerisaqaqatigiit" piunngippata nuna allaanerussagaluarpoq, pisortaaneq isumaqarpoq.
Facebook. Google. Twitter.
Mumisitsineq digitaaliusup tusagassiivinnik tusagasseeriaatsinillu nutaanik amerlaqisunillu pilersitsivoq, taakkunannga amerlasuut nunarsuaq tamakkerlugu siaruarsimasut, sapaatip-akunnerani ullut tamaasa ulloq unnuarlu (24/7) aliikkusersuinernik nutarsaanernillu nassiussivigiuarpaatigut. Nunarsuaq tamakkerlugu suliffeqarferujussuarnut unammillerniarluni kalaallit tusagassiiviutaat sunik neqeroorutissaqarpat?
- Soorunami Kalaallit Nunaanni pisut annerujussuarmik soqutigisaraavut. Uagut nammineq tusagassiiveqarfitsinnit aamma KNR-imit qanimut tusagassiinermik ingerlatsineq nunami immikkuullarissumik ataqatigiinnermik peqartitsivoq. Uagut tusagassiiviutitta nunami pissutsit pillugit politikkikkut ajornartorsiutit kisiisa allaaserineq ajorpaat, soorlu Danmarkimi tusagassiiviit oqaaseqartartullu tamakkuninnga ukkassinissamik kisiat soqutigisaqartartut. Tusagassiinermik suliassaqarfiup sannataasivianit tusagassiineq tamatigoortoq neqeroorutigaarput, inuinnaat itisiliisarnerannik eqqarsaatersuutinik imalik nunanit tamalaanit tusagassiiverujussuit neqeroorutigisinnaanngisaat, Mediehuset Sermitsiaq.AG-imi pisortaaneq, Christian Schultz-Lorentzen akivoq.
Taanna inuup inuunerata affaanik sivisussuseqartumik Kalaallit Nunaanni tusagassiinermik suliaqarsimavoq, aamma maannakkorpiaq nunatsinni politikkikkut oqaluttuarisaaneq pillugu atuakkami nutaami allaaserinneqataavoq: Drømmen om frihed (Politikens Forlag).
- Kalaallit Nunaanni tusagassiornerup silarsuaani ukiuni aggersuni qulini suut annermik unammilligassaasoraagit?
- Kalaallit Nunaanni Tusagassiornermik ilinniarfik ilinniartunik tusagassiortutut isornartorsiuisartutut sulerusuttunik amerlanerujussuarnik naammassinnitsitsissaaq. Tusagassiortut taamaattut amigaatigeqaagut. Tusagassiornermik Ilinniarfeqartilluta paasisinnaanngilara sooq taamaattoqarnersoq. Taakkua saniatigut paasissutissiinermik tusagassiisartut amerliartuinnartut. Oqimaaqatigiinnginneq ullumikkut equsoorluinnarsimavoq aamma suli ajornerulernissaanut aarlerinartoqarpoq, Christian Schultz-Lorentzen akivoq.
Uungaarannguaq isigineq
Nuummi Ilisimatusarfiup siorna tusagassiisarneq pillugu nalunaarusiaq saqqummersitaa oqallinermik annertuumik pilersitsivoq. Tassani erseqqissaatigineqarpoq Kalaallit Nunaanni qangatut tusagassiornermik aamma misissuilluni tusagassiornermik killilimmik ingerlatsisoqartoq.
- Isornartorsiuineq taanna illit qanoq isumaqarfigaajuk?
- Aaqqissuisoqarfinni sulisut amerlassusiat qiviarlugit tusagassiiviit namminneq oqaluttuanik pilersitsisarnerat isigigaanni, taakkununnga ilanngullugit isornartorsiuilluni tusagassiisarneq, taava suliat amerlassusiat tulluussimaarnarpoq. Sammisat assigiinngitsut amerlasuut isiginiarneqartaramik. Tusagassiisarneq pillugu nalunaarusiap ajornartorsiutigaa, oqaluttuanik kisitsinermi allatat aamma allaaserisat sisamanik quppernillit naqqaniit misissuinermik imallit akornanni assigiinngisitsinermik isiginnittaaseqannginnami. Allaaserisat tamarmik immikkoortutut ataasiakkaatut taamaallaat isigineqarput. Taava soorunami tusagassiinermik silarsuarmi pilersitat equngasumik saqqummersinneqassapput, Schultz-Lorentzen akivoq.
- Tusagassiineq annertunerujartortoq pappiaqqamit internettimut nuukkiartorpoq. Taamannak ineriartortoqarnera tusagassiinermik qanoq allanngortitseqqissava?
- Internettip iluaqqutissartai tupinnartuunngillat. Tassani nutaarsiassanik naatsunik pitsaasunik pilertortumik saqqummersitsisoqarsinnaavoq. Kisianni internettimi tusagassiorneq kisimi ingerlanneqarsinnaanngilaq. Qularinngilara aviisit ilisimasassanik tamatigoortunik imallit suli pingaaruteqarluinnartumik inissisimassanissaat.
- Tusagassiiviit pisortanit suli taperneqartassanersut akuttunngitsumik oqallisigineqartarpoq. Illit sooq isumaqarpit tusagassiivinnik tapiisarnermik aaqqissuussineq atuuttariaqartoq?
- Tusagassiiviit isertitaqarnissaannut tunngavissaq annikippallaarpoq. Siorna mediehusi tapiissutinik pissarsisimanngitsuuguni sinneqartoorutai amerlanavianngikkaluarput. Uani pingaaruteqarpoq aviisit akillit siammasinnerusumik eqqarsartaaseqarluni isigineqarnissaat. Aviisini nutaarsiassaatigut pingaanerit tamarmik sermitsiaq.ag-mi imaluunniit KNR-imit issuarneqartarput. Taamaattumik aviisini akilinni tusagassiortut qulit tusagassiortullu namminersortut atortakkavut tusagassiortoqatigiinni ilaapput pingaaruteqarluinnartut. Taamannak aaqqissuussineq piunngitsuuppat nutaarsiassaqartitsineq sutigut tamatigut appariarujssuassagaluarpoq. Tamat sorpassuartigut tappiillisitaassapput. Aap, tassa ullumikkut Kalaallit Nunaat isikkumisut isikkoqassanngikkaluarpoq tusagassiortoqatigiit piunngitsuuppata.
Allaaserisaq tamakkerlugu aviisimi akeqanngitsumik agguaanneqarsimasumi atuarsinnaavat. Saqqummersitaq Namminersorlutik Oqartussat ukiuni qulinngortorsiorneranut atatillugu saqqummersinneqartoq uani pissarsiarisinnaavat.