Ukiuni qulini Namminersorlutik Oqartussat: Qaqugu tikeraassavisigut?

Illut qalipaatigissaartut nunami ujaraqaqisumi siammarsimapput. Assimi takornarianut atugaasussami illoqarfik alianaatsorsuuvoq pingaartumik aasaanerani sikorsuit Scoreby Sund sarsuallugu ingerlaarfianni, illoqarfillu angallammik tikinneqarsinnaatillugu. Nunaqarfik nunaqarfiit allat amerlaqisut assigai, kangerluarsummi sissamut qanilluni inissisimasoq aamma najugaqarfiup qeqqani oqaluffeqarpoq.

Nunap assiga qaqikkaanni erseqqilluinnarpoq Ittoqqortoormiit najugaqarfinnut allanut assersuunneqarsinnaanngitsoq.

Innuttaasut 370-it missaat annermik imminiigaapput. Illoqarfik qaninneq ungasissumiippoq – ungasissorujussuarmiippoq. Ungasissutsit paasiuminaassinnaapput: Nuummut 1.400 kilometerit, Tasiilamut 800 kilometerit. Tuluit aviisiat The Guardian ukiakkut 2016 nunaqarfik pillugu allaaserisanik saqqummiussilluni nunaqarfik pillugu allappoq »nunarsuarmi illoqarfiit isorliuinerpaartaat«, aammami Erling Madsen tassunga akerliliisinnaanngilaq, illoqarfinnit angisuunit aalajangersaaffiusuniillu avinngarusimasutut immikkoortitaalluni misigisoqarsinnaaneranut.

Erling Madsen Ittoqqortoormiini inunngorpoq siornatigut tamaani borgmesteriusimalluni, maanna piniarnermut nakkutilliisuuvoq aamma nunaqarfimmi inuit oqaasissallit nuimarnersaannut ilaavoq. Nunap immikkoortuani qaqqat tamaasa nalunngilai. Isertussinnaanngilaa ukiut qaangiuttut qulit kingulliit namminersorluni ingerlatsinerup nalaani pissutsit ineriartornerat pillugu pakatsinerup siammaannera.

- Uagut nammineq kommuniugallaratta ukiut tamaasa Inatsisartunit tikinneqartarpugut. Kisiani namminersorluni oqartussaanerup eqqunneqarnerata kingorna ataasiarlutaluunniit nunatsinni politikerinit tikinneqanngilagut. Taamaattoqarnera inuiaqatigiittut puiugaasutut misigisimanermut qaffassaataavoq, Erling Madsen oqarpoq.

Nakorsaq?

Taamaattoq Ittoqqortoormiit puigorneqavissimanngillat. Poorski sioqqullugu Kommuneqarfik Sermersuumi politikkikkut ataatsimiititanut marlunnut ilaasortat tikeraarput. Politikerit ilaatigut Ejnar Mikkelsenip Aluarpianut pulaarput taanna meqqat inuusuttullu 55-it atuartutut inuunerannut sinakkusiivoq.

Erling Madsen oqaluttuarpoq tikeraat nuannaarutaasut aamma innuttaasut amerlaqisut najukkami politikerinik oqaloqateqarniarlutik innuttaasunut ataatsimiititsinermi peqataasut.

- Oqaluuserineqartut pitsaasut amerlapput.uagut nammineq isummatsinnik saqqummiussinissamut periarfissaqartinneqarpugut. Suut tamangajalluinnarmik ajornartorsiutaapput. Ilaatigut peqqinnissaqarfik. Ungasinngitsumi oqaluttuunneqarpunga maannamut nakorsarigallagarput angerlarluni aallartussanngortoq. Soorunami ernumaammernarpoq qaqugorujussuaq aatsaat nutaamik nakorsartaaqqissinnaagatta, aamma pissutsinik ulorianartunik kinguneqarsinnaammat, Erling Madsen nassuiaavoq.

Helikopteri mittarfimmit tingimmat innuttaasut nassuerutigaat piffissaq sivisooq ingerlasinnaasoq Nuummit »kusanartunit« tikeraarteqaqqinnissamut.

Allaaserisaqtamakkerluguaviisimiakeqanngitsumikagguaanneqarsimasumiatuarsinnaavat.SaqqummersitaqNamminersorlutikOqartussatukiuniqulinngortorsiorneranutatatillugusaqqummersinneqartoquanipissarsiarisinnaavat.