Ukiuni arfinilinni utaqqereerluni: Isak Dronningip nersornaasiuttagaanik nersornaaserneqarpoq
Ukiut arfinillit ingerlasimapput Dronningip nersornaasiuttagaata Isak Mathiassenimut tunniunneqarsinnaanngornissaanut, tamannalu tallimanngormat Saattut atuarfianni pisimavoq.
Isak Mathiassen ukiuni 50-ini aalajaatsumik qatserisartutut sulisimanermini, Dronningip nersornaasiuttaagaanik tallimanngormat tunineqarpoq, nersornaat Avannaata Kommuniani upalungaasimanermut pisortamit Jens Dahlimit tunniunneqarpoq.
- Nalliuttorsiortoq qatserisartuni sulilersimavoq 1964-imi, nersornaallu ullulerneqarsimalluni 01. September 2014. Assigiinngitsunillu peqquteqartumik nersornaat aatsaat ukioq manna tunniunneqarpoq, tassani Uummannami qatserisartoqarfiata ittua Isak Pjettursson aammalu Avannaata Kommuniani Upalungaarsimanermut pisortap ataani atsiortup, nunaqarfinnut angalanerat iluatsillugu, tusagassiorfinnut nalunaaruteqarnermi ilisimatitsissutigineqarpoq.
- Taamaattumik Isak Mathiassenip qatserisartutut sulisimanerani ukiut eqqortut tassaapput 56-it, tamannalu inuttaanut, suleqataanut aammalu ilaqutaanut ulloq pingaaruteqarsimaqaaq, Jens Dahl allappoq, sulisimanerlu pillugu nangilluni:
Sulineq unammillernartoq
- Kalaallit nunaani nunaqarfinni qatserisartunik aqutsisuuneq imaannaanngittaqaaq; tassani inuttaqarniarnikkut aammalu atortunik peqquteqartunik unimmillernartuulluni, tassami qatserisartut ilaatigut inuussutissarsiutertik aalisarneq pinianerlu ingerlatartik aamma paarisussaammatigit. Atortullu aserfallannginnissaat paaqqutarinerilu aamma annertuumik akisussaaffimmik tigusisarlutik.
Nersornaasiinermi ilaatigut peqataapput nunaqarfimmi aqutsisoq, illoqarfimmiit allaffissornikkut suleqataasumit, qatserisartoqataasut, minnerunngitsumillu nuliaa Aaninnguaq Mathiassen aammalu taakkunannga erngutaasut erngutaaqqiutaasullu.